	Veðurstofa Íslands Jarðeðlissvið

Jarðskjálftar 960617 - 960623, vika 25

Til að prenta kortið má nota postscript

Vikan var með rólegra móti, skráðir og staðsettir skjálftar voru 269.

Suðurland

Auk nokkurra skjálfta á Hengilssvæðinu og í Ölfusi, hélt jörð áfram að pipra nærri Saurbæ í Holtum. Virkni hófst þarna í byrjun maí með einum til tveimur skjálftum á dag. Dagana 26., 27. og 29. maí urðu þarna litlar skjálftahrinur með á þriðja tug skjálfta hver. Þann 21. júni urðu í Holtunum um 30 skjálftar, þeir stærstu af stærðinni 1.6.

Afstæðar staðsetningar nokkurra skjálfta frá fyrri hluta maí mánaðar benda til að hreyfingin hafi þá verið á nær lóðréttri sprungu með stefnu um 68A. Brotlausnir stærstu skjálftanna benda til blöndu af samgengis- og vinstri handar sniðgengishreyfingu á flötum með svipað strik og fæst út frá innbyrðis staðsetningum skjálftanna. Halli brotflatanna samkvæmt brotlausnum er þó ívið minni (60-70 gráður) en halli sprungunnar, metinn með upptakagreiningu skjálftanna. Athugun á skjálftahrinunum eftir 20. maí sýnir að þær urðu allar á sprungu eða sprungum með strik um 20A. Hreyfing í þessum skjálftum er yfirleitt hægri handar sniðgengi, líkt og í stærri skjálftum í skjálftabeltinu.

Undir Vatnajökli voru staðsettir þrír skjálftar, sá stærsti um 3.0 að stærð. Í Kötlu urðu tveir skjálftar, 1.9 og 1.7 að stærð. Atburður nærri Þyrli í Hvalfirði er að öllum líkindum sprenging.

Norðurland

Nokkrir skjálftar urðu í Öxarfirði og á Grímseyjarbeltinu. Einnig varð lítil hrina suðaustur af Flatey, á svipuðum slóðum og M=3.4 skjálftinn 26. janúar síðastliðinn.

Sigurður Th. Rögnvaldsson