Veðurstofa Íslands
Jarðeðlissvið

Jarðskjálftar 961202 - 961208, vika 49

[Skjálftalisti] [Fyrri vika] [Næsta vika] [Aðrar vikur] [Jarðeðlissvið]

Til að prenta kortið má nota postscript

Alls voru staðsettir 309 atburðir í vikunni, þar af 3 sprengingar í grjótnámi Reykjavíkurborgar við Hafravatn.

Suðurland

Nokkrar hrinur smáskjálfta urðu á Hengilssvæðinu í vikunni. Þann 7. desember skráði kerfið hrinu með upptök í Reykjadal um 2 km NNV af Hveragerði. Klukkan 21:07 þann 8.12. varð skjálfti af stærðinni 2.3 um 2 km NNV af Selfossi. Skjálftinn fannst á Selfossi. Honum fylgdu nokkrir smærri kippir. Nokkrir skjálftar urðu á Torfajökulssvæðinu og í Mýrdalsjökli.

Norðurland

Á Grímseyjarmisgenginu urðu nokkrir skjálftar sem dreifast eftir beltinu allt frá Grímsey inn á Öxarfjörð. Dagana 5. og 6. desember urðu á þriðja tug jarðskjálfta undir Víknafjöllum (66,06N, 17,85V) á Eystriskaga. Skjálftarnir eru á um 8 km dýpi. Sá stærsti er 3,3 á Rictherskvarða en hinir á bilinu 0,5 til 1,5. Innbyrðis staðsetningar skjálftanna benda til að þeir hafi orðið á misgengi með stefnu milli hánorðurs og norðnorðvesturs. Besta plan gegnum þyrpinguna hefur strik 149 gráður og er meðalfjarlægð skjálftanna frá því um 41 m. Staðsetning skjálftanna er þó þannig að meðalfjarlægð þeirra frá lóðréttum fleti með strik milli N og NNV er ávallt innan við 50 m. Strikstefnan er því ekki mjög vel ákvörðuð en þó greinilega norðlæg. Brotflöturinn er nær lóðréttur. Stefna misgengisins, samkvæmt innbyrðis staðsetningunum, er í góðu samræmi við brotlausnir skjálftanna, sem benda til sniðgengishreyfinga á fleti með N-S eða A-V stefnu. Ef brotið er á fleti með N-S stefnu er færslan í upptökunum vinstri hliðrun, þ.e. austan við flötinn hrekkur bergið til norðurs.

Á undanförnum mánuðum og árum haf orðið nokkrar skjálftahrinur austur af Flatey. Þær eru flestar á flötum með norðlæga stefnu og virðast misgengin fylgja vesturbrún Skjálfanda. Má vel hugsa sér að skjálftarnir í Víknafjöllum nú séu á sama misgengi eða brotabelti, sem þá teygist eitthvað suður á skagann. Ef um er að ræða samfellt misgengi hlýtur það að skera Flateyjarmisgengið sem liggur með ströndinni og stefnir VNV-ASA. Það er kannski ekki mjög sennilegt en þó má benda á að í nágrenni Húsavíkur hefur bergið sunnan við Flateyjarmisgengið sigið en þegar komið er vestur undir Flatey er það bergið norðan við misgengið sem sigið hefur. Endurkastsmælingar (Kjartan Thors, 1982) benda einnig til að FLateyjarmisgengið sé ekki samfellt yfir Skjálfandann allan.

Hálendið

Nokkrir skjálftar mældust í nágrenni gosstöðvanna í Vatnajökli og einn í vestanverðum Langjökli.

Sigurður Th. Rögnvaldsson