	Veðurstofa Íslands Jarðeðlissvið

Jarðskjálftar 970324 - 970330, vika 13

Til að prenta kortið má nota postscript

Skjálftavirkni var talsverð í vikunni. Mest bar á skjálftum í Henglinum en einnig talsvert í Vatnajökli. Alls voru staðsettir 368 skjálftar í vikunni.

Suðurland

Skjálftahrina hófst í Henglinum þriðjudaginn 25. mars rétt fyrir klukkan 18. Skjálftarnir voru flestir litlir, sá stærsti um 2.7 stig. Til að byrja með voru flestir þeirra í grennd við Hrómundartind og Ölkelduháls en svo bættist við skjálftavirkni sunnar, við Skálafell, er líða tók á vikuna.

Einn skjálfti varð út á Selvogsbanka. Hann sást á mörgum mælistöðvum á Suðurlandi og því nokkuð rétt staðsettur. Ekki er algengt að sjá skjálfta á þessum slóðum.

Nokkrir skjálftar mældust líka rétt austan Þjórsár, í grennd við Ásmúla.

Einn skjálfti var staðsettur í grennd við Laufafell, suðaustan Heklu.

Norðurland

Fyrri hluta vikunnar varð talsvert af skjálftum í mynni Skagafjarðar og við Grímsey. Einn skjálfti af stærðinn 2,7 stig varð í Mývatnssveit.

Hálendið

Mýrdalsjökull hristist tvisvar, sem mælt var, en líflegra var í Vatnajökli. Þar mælast að jafnaði nokkrir skjálftar á dag og virðist virkni vera vaxandi ef eitthvað er.

Pálmi Erlendsson