	Veðurstofa Íslands Jarðeðlissvið

Jarðskjálftar 20000117 - 20000123, vika 03

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Í vikunni voru 192 skjálftar staðsettir.

Suðurland

Mánudaginn 17. janúar milli kl. 18 - 20 var smáskjálftahrina við Trölladyngju á Reykjanesskaganum. Stærstu skjálftarnir voru að stærð um 2 á Richter. Næstu 2-3 dagana á eftir voru einnig skjálftar á þessum stað.

Aðfaranótt sama mánudags kl. 04:12 var skjálfti í Ástaðafjalli norðan við Kamba um 4 km NV af Hveragerði. Stærð skjálftans var 2.7 á Richter og fannst hann lítillega í Hveragerði. Í kjölfar skjálftans og fram til um kl 06 um morguninn komu um 10 eftirskjálftar. Skjálftavirkni á Hengilssvæðinu var að öðru leyti mjög róleg þessa viku.

Um helgina 22.-23. janúar voru 9 skjálftar með upptök um 4 km sunnan við Skarð í Landssveit. Þeir áttu allir upptök á sama stað á um 8 km dýpi og koma fram á kortunum sem einn punktur. Flestir skjálftanna voru á stærðarbilinu 0.3-0.6 á Richter.

Norðurland

Úti fyrir Norðurlandi voru skjálftar fyrir mynni Eyjafjarðar og norðan við Flatey á Skjálfanda.

Þann 18. janúar kl. 15:50 var einn skjálfti (M=2.6) norður á Kolbeinseyjarhrygg, nálægt SPAR brotabeltinu.

Þann 17. janúar kl. 20:08 var skjálfti nálægt Glaumbæ í Skagafirði (M=2.0).

Hálendið

Í vikunni voru 17 skjálftar undir vestanverðum Mýrdalsjökli. Stærsti skjálftinn var þann 18. janúar kl. 08:35 og var hann 2.6 stig á Richter. Einn lítill skjálfti var undir norðurbrún Kötluöskjunnar.

7 skjálftar voru á Torfajökulssvæðinu og voru þeir allir um 1 stig á Richter.

Þann 21. janúar kl. 22:02 var skjálfti við Bjallavað í Tungná (M=1.6)

Einn skjálfti (M=1.7) var við Hamarinn í vestanverðum Vatnajökli þann 18. jan. kl. 10:49.

Þann 21. janúar kl. 21:24 var skjálfti (M=1.8) í Herðubreiðarfjöllum.

Gunnar B. Guðmundsson