	Veðurstofa Íslands Jarðeðlissvið

Jarðskjálftar 20010924 - 20010930, vika 39

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Í vikunni mældust um 1450 skjálftar og voru flestir þeirra, eða um 1200 í Öxarfirði. Þessi hrina í Öxarfirði var í hámarki á miðvikudag í seinustu viku, þegar yfir 800 skjálftar mældust, en nú var fjöldinn um og yfir 200 á dag. Á sunnudag fór svo að draga verulega úr virkni á svæðinu. Flestir skjálftarnir í hrinunni voru í kringum Ml=1,4, en stærðardreifingin var frá 0,5 upp í 2,7. Einn skjálfti (Ml=1,5) mældist við Grænalón kl. 22:30 á þriðjudagskvöld, en yfirborð lónsins hafði lækkað um nokkra metra vegna hlaups í Súlu á mánudag og þriðjudag. Á fimmtudagsmorgun mældust svo 8 skjálftar undir vestanverðum Skeiðarárjökli. þeir voru flestir í kringum Ml=1. Önnur skjálftavirkni á landinu var svipuð og venjulega.

Suðurland

Virkni á Suðurlandi var aðallega á Holta- (43 skjálftar) og Hestfjallssprungunum (58 skjálftar). Stærðir þeirra skjálfta var á bilinu -1,1 til 1,1. Einnig var nokkur virkni á Hengilssvæðinu, norðan Hveragerðis (22 skjálftar), en þar varð lítilli hrina á þriðjudagsmorgun. Tveir stærstu skjálftarnir þar voru 2,1 og 2,5 að stærð og fundust í Hveragerði. Auk þessa var dreifð virkni á Suðurlandi. Á Reykjanesi mældust 5 skjálftar, tveir við við Kleifarvatn tveir við Grindavík og einn á Reykjanestá; allir undir 1,5 að stærð. Við Geirfuglasker mældust svo 4 skjálftar allir nálægt 2 að stærð.

Norðurland

Á norðurlandi var virkni mest í Öxarfirði, en þar mældust um tólf hundruð skjálftar og var sá stærsti 2,7 að stærð. Við Húsavík voru þrír skjálftar og norður af Flatey tveir, allir undir 1 að stærð. Við Grímsey voru sex ( Ml~1,3) skjálftar og norður af Tröllaskaga ellefu skjálftar allir í kringum 1 að stærð.

Hálendið

Við Hofsjökul mældust þrír skjálftar (Ml=1,4 - 2,2). Í Vatnajökli mældust 10 skjálftar, einn (Ml=1,4) við sunnanverða Bárðarbungu. Einn (Ml=1,5) við Grænalón á þriðjudagskvöldið, í kjölfar hlaupsins í Súlu, og svo 8 skjálftar á fimmtudagsmorgun (Ml=0,9 - 1,6) við suðvestanverðan Skeiðarárjökul. Í Mýrdalsjökli skráðust 17 skjálftar á stærðarbilinu 0,7 - 2,0. Flestir þeirra voru við Goðabungu, í vestanverðum jöklinum, og voru þeir mjög grunnir. Einn skjálfti var inni í Kötluöskjunni á um 3 km dýpi, og einn suðaustan við jaðar öskjunnar á yfir 10 km dýpi. Við Torfajökul mældist einn skjálfti.

Kristín S. Vogfjörð