	Veðurstofa Íslands Jarðeðlissvið

Jarðskjálftar 20080512 - 20080518, vika 20

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Í vikunni var talsverð virkni, víða um land. Alls voru staðsettir 370 jarðskjálftar og 8 atburðir sem líklega eru sprengingar. Þrír skjálftar mældust yfir 3 að stærð, á mánudag í norðanverðri Bárðarbungur, á laugardag vestan við Flatey á Skjálfanda og aðfaranótt sunnudags undir vesturhorni Kleifarvatns.

Suðurland

Einn djúpur skjálfti mældist skammt norðan við Heimaey.

Reykjanesskagi

Klukkan 00:04 aðfaranótt sunnudags hófst hrina jarðskjálfta undir vesturenda Kleifarvatns. Stærsti skjálftinn, 3.0 að stærð, varð klukkan 00:45, hann fannst í Hafnarfirði og annarsstaðar á Höfuðborgarsvæðinu. Aðrir skjálftar í hrinunni voru M1.0 eða minni. Klukkan 11:00 á sunnudag höfðu 66 skjálftar verið staðsettir í þessari hrinu.

Sjö jarðskjálftar mældust á Reykjaneshrygg, um 10 km SV af Geirfugladrangi.

Norðurland

Jarðskjálfti, 3.1 að stærð varð við minni Hvalvatnsfjarðar, 8 km vestur af Flatey á Skjálfanda. klukkan 9:04 á laugardag. Á næstu tveimur klukkustundum mældust þar 6 eftirskjálftar, sá stærsti 2.3 að stærð. Tæplega 60 skjálftar mældust í vikunni við vesturenda Húsavíkur-Flateyjar misgengisins, 26 km norður af Siglufirði, og 10 til viðbótar skammt þar fyrir norðan, í vesturbarmi Eyjafjarðaráls.

Fjórir skjálftar mældust skammt sunnan við Þeystareyki og tveir nærri Bjarnaflagi í Mývatnssveit.

Hálendið

Klukkan 13:38 á mánudag varð skjálfti, 3.6 að stærð skammt norðan við öskjuna í Bárðarbungu. Þetta var upphafið af talsverðri hrinu, það sem eftir var vikunnar mældust þarna tæplega 60 skjálftar, stærri en 1.0.

Fimm skjálftar voru staðsettir undir Skálpanesi, í SA jaðri Langjökuls.

Engir djúpir skjálftar mældust við Upptyppinga og Álftadalsdyngju í vikunni en nokkur dreifð virkni var á svæðinu milli Öskju og Herðubreiðar. Á fimmtudag mældust 4 skjálftar norðarlega í Herðubreiðarfjöllum.

Mýrdalsjökull

Fimm skjálftar mældust undir Mýrdalsjökli, þar af einn við Goðabungu.

Einar Kjartansson