	Veðurstofa Íslands Jarðeðlissvið

Jarðskjálftar 20081215 - 20081221, vika 51

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Í vikunni mældust 242 jarðskjálftar auk einnar staðfestrar sprengingar og nokkurra líklegra sprenginga. Mesta virknin var á svæðinu norðan Vatnajökuls.

Suðurland

Tæplega 60 skjálftar mældust á Suðurlandi og voru þeir allir um og innan við einn að stærð. Mesta virknin var á Kross-sprungunni eins og undanfarnar vikur.

Reykjanesskagi

Fjórtán skjálftar mældust á Reykjanesskaga. Sá stærsti varð um hádegisbil á mánudegi og var hann 2,6 stig að stærð og fannst bæði í Reykjavík og Hafnarfirði. Nokkur virkni var á Reykjaneshrygg en þar mældust sjö jarðskjálftar og var sá stærsti 3,0 stig.

Norðurland

Á og úti fyrir Norðurlandi mældust 32 skjálftar og var stærsti skjálftinn 2,0 stig, suðaustan við Grímsey. Mesta virknin var í Öxarfirði en þar náði enginn skjálfti tveimur stigum. Þrír skjálftar mældust við Jan Mayen.

Hálendið

Mesta virknin var norðan Vatnajökuls þar sem mældust 87 skjálftar. Við Lokatind norðan Dyngjufjalla mældust 36 skjálftar frá miðvikudegi og út vikuna og var stærsti skjálftinn 2,5 stig og var það jafnframt stærsti skjálftinn á þessu svæði. Í Vatnajökli urðu ríflega 30 skjálftar. Undir Bárðarbungu mældust tíu skjálftar og var sá stærsti 2,0 stig. Við Kistufell urðu níu skjálftar, einn skjálfti 1,0 að stærði í Öræfajökli og einn í norðanverðum Hofsjökli og var hann 1,6 stig.

Mýrdalsjökull

Sextán skjálftar urðu í Mýrdalsjökli, flestir í vestanverðum jöklinum. Tveir skjálftar náðu tveimur stigum að stærð, annar við Goðabungu en hinn inni í öskjunni. Sex skjálftar mældust á Torfajökulssvæðinu og var sá stærsti tæplega 2 stig.

Sigþrúður Ármannsdóttir