	Veðurstofa Íslands Jarðeðlissvið

Jarðskjálftar 20110620 - 20110626, vika 25

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Í vikunni voru 247 atburðir staðsettir, þar á meðal nokkrar sprengingar. Stærsti skjálfti vikunnar var undir Geitlandsjökli, 2,7 stig.

Suðurland

Yfir 40 smáskjálftar mældust á Hengilssvæðinu og í Ölfusi. Flestir áttu upptök á suðurhluta Krosssprungu og við Raufarhólshelli. Stærð skjálftanna var á bilinu -0,5 - 1,1 stig. Á Suðurlands undirlendinu mældust aðeins um 15 jarðskjálftar, flestir á Hestvatnssprungunni. Þeir voru allir um og innan við einn að stærð.

Reykjaneshryggur og -skagi

Nokkrir skjálftar mældust út á Reykjaneshrygg, sá stærsti Ml 1,7 stig. Skjálftar á Reykjanesskaga áttu langflestir upptök vestan Kleifarvatns. Þar mældust 25 jarðskjálftar, aðallega við Trölladyngju og suðurhluta Sveifluháls. Þeir voru allir innan við einn að stærð. Vestan við Bláfjöll mældust nokkrir smáskjálftar.

Norðurland

Um 40 jarðskjálftar áttu upptök norður af landinu, flestir austan Grímseyjar og í Öxarfirði. Stærstu skjálftar voru 2,1 að stærð. Nokkur skjálftavirkni var úti fyrir mynni Eyjafjarðar og við Flatey á Skjálfanda.
Fjórir smáskjálftar mældust á Kröflusvæðinu og tveir á Þeistareykjasvæðinu.

Hálendið

Fimmtán jarðskjálftar áttu upptök undir Geitlandsjökli í vikunni, sá stærsti 2,7 stig. Helgina 18. - 19. júní mældust þar um 50 jarðskjálftar og einnig um 50 þann 7. júní. Stærsti skjálftinn í vikunni var 2,7 stig.
Lítil skjálftavirkni var undir Vatnajökli. Nokkrir skjálftar áttu upptök á Lokahrygg og við Kistufell og stakir skjálftar undir Bárðarbungu, Kverkfjöll og norður af Skeiðarárjökli.
Á svæðinu norðan Vatnajökuls mældust 14 jarðskjálftar, undir Öskju og í kringum Herðubreið og Herðubreiðartögl. Stærsti skjálftinn á svæðinu var 1,2 stig.

Mýrdalsjökull

Rúmlega 40 skjálftar áttu upptök undir Mýrdalsjökli, yfir 20 við Goðabungu og einnig yfir 20 innan Kötluöskjunnar. Stærstu skjálftarnir voru um tvö stig. Á Torfajökulssvæðinu mældust fimm skjálftar, 0,8 - 1,4 að stærð.

Bergþóra S. Þorbjarnardóttir