	Veðurstofa Íslands Jarðeðlissvið

Jarðskjálftar 20120305 - 20120311, vika 10

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Í vikunni greindust 118 skjálftar og var vikan fremur tíðindalítil. Stærsti skjálftinn mældist M_l 2,5 að stærð og varð þann 10. mars nyrst í Tjörnesbrotabeltinu, um 40 km NNV af Grímsey.

Suðurland

Á Hengilssvæði mældust níu skjálftar. Einn þeirra varð norður af Hveragerði en hinir við Húsmúla. Fimmtán skjálftar greindust í Suðurlandsbrotabeltinu, allt frá Hjallahverfi í Ölfusi og austur að Krókahrauni (Selsundslæk). Stærsti skjálftinn á þessu svæði mældist 2,1 að stærð og varð hann í Hjallahverfi (3,5 km ANA af Raufarhólshelli).

Reykjanesskagi

Einn skjálfti mældist um 10 km norður af Eldey á Reykjaneshrygg og sextán skjálftar mældust á Reykjanesskaganum í vikunni. Um helmingur þeirra var við Kleifarvatn, átta talsins, m.a. næststærsti skjálftinn sem mældist á landinu þessa vikuna (M_l 2,3). Aðeins fjórir skjálftar urðu á eða nærri Helgafellssprungunni, þar sem skjálfti að stærð 4,2 varð í síðustu viku. Tveir skjálftar mældust við Bláfjöll og einn á Reykjanesi.

Norðurland

Einn jarðskjálfti greindist við Kröflu. Skjálftar mældust á öllum þremur misgengjum Tjörnesbrotabeltisins: fjórir mældust á Dalvíkurmisgenginu (þar af tveir úti fyrir Skagafirði og tveir nærri Dalvík), sjö á Húsavíkur-Flateyjarmisgenginu (á Skjálfanda og úti fyrir mynni Eyjafjarðar), og fimmtán á Grímseyjarmisgenginu (frá Öxarfirði/Kópaskeri og norður fyrir Grímsey).

Hálendið

Sjö skjálftar urðu undir/við Vatnajökul norðan- og vestanverðan og níu í nágrenni Öskju og Herðubreiðar.

Mýrdalsjökull

Tuttugu og sjö skjálftar voru staðsettir í Mýrdalsjökli. Sex skjálftar greindust vestan Goðabungu, 18 innan öskjunnar og einn rétt norður af Hafursárjökli (sunnan öskjunnar). Stærsti skjálftinn mældist M_l 2,2 að stærð og var hann staðsettur innan öskjunnar. Auk þess greindist einn skjálfti við Torfajökul.

Sigurlaug Hjaltadóttir