	Veðurstofa Íslands Jarðeðlissvið

Jarðskjálftar 20120514 - 20120520, vika 20

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Um 630 jarðskjálftar voru staðsettir í vikunni. Þar af voru rúmlega 450 jarðskjálftar með upptök við Herðubreið í jarðskjálftahrinu sem hófst með jarðskjálfta um 3 að stærð þann 14. maí og stóð fram eftir vikunni. Talsverð smáskjálftavirkni var undir Mýrdalsjökli og þá aðallega undir Kötluöskjunni. Um helgina var smáhrina norðaustur af Grímsey. Einnig voru fáeinir smáskjálftar við Reykjanestána þar sem Reykjaneshryggurinn kemur upp á land.

Suðurland

Mjög lítil skjálftavirkni var á Hengilssvæðinu og á Suðurlandi. Fáeinir smáskjálftar í Ölfusinu, í Holtum og Landsveit.

Reykjanesskagi

Þann 15. maí mældust 2 jarðskjálftar langt suður á Reykjaneshrygg á um 60° breiddargráðu og voru þeir um 3,7 að stærð. Þann 16. maí voru skjálftar um 1 að stærð við Eldey og Geirfugladrang á Reykjaneshrygg og 17. maí mældust tæplega 10 jarðskjálftar með upptök við Reykjanestá. Stærsti skjálftinn þar var 1,4 að stærð

Fáeinir smáskjálftar voru á Krýsuvíkursvæðinu við Kleifarvatn á Reykjanesskaga. Sá stærsti 2 að stærð 14. maí.

Norðurland

Á Kolbeinseyjarhrygg um og við 68° breiddargráðu mældust 12 jarðskjálftar og voru stærstu skjálftarnir rúmlega 3 að stærð.

Úti fyrir Norðurlandi á Tjörnesbrotabeltinu mældust 40 jarðskjálftar. Stærsti skjálftinn mældist 2,6 stig þann 18. maí kl. 04:01, með upptök norðvestur af Tjörnesi. Síðustu 3 daga vikunnar mældust 16 jarðskjálftar við Grímsey aðallega norðaustur af eynni við jarðhitasvæðið sem þar er. Fáeinir skjálftar voru einnig úti fyrir mynni Eyjafjarðar, í Öxarfirði og á Skjálfanda.

Þann 18. maí kl. 21:41 var jarðskjálfti tæplega einn að stærð með upptök 5 km austur af Akureyri.
Stakir smáskjálftar voru við Þeistareyki og Kröflu.

Hálendið

Mánudaginn 14. maí kl. 12:45 varð jarðskjálfti rúmlega 3 að stærð með upptök um 3-4 km suðvestur af Herðubreið. Hann var á grunnu dýpi og brotlausn hans sýnir samgengi með smá sniðgengisþætti. Í framhaldinu hófst jarðskjálftahrina á svæðinu sem varaði fram eftir vikunni. Sjá einnig. Afstæðar staðsetningar á upptökum skjálftanna við Herðubreið frá 14.-17. maí. Upptökin eru aðallega á tveimur lóðréttum samsíða brotplönum þar sem annað er með strikstefnu N41°A en hitt brotaplanið hefur strik N221°A (eða 49°). Á hægri hluta myndanna er horft ofan á skjálftana og til vinstri er horft þvert á strikstefnuna. Miðað við hraðalíkanið (sil) þá eru skjálftarnir aðallega á tæplega 5 km og niður á um 6 km dýpi.

Frá um 2005 hefur jarðskjálftamælum fjölgað á svæðinu og frá þeim tíma hafa mælst fjöldi smáskjálfta við Herðubreið og Herðubreiðartögl og þá mest í jarðskjálftahrinum. Það hefur sýnt sig að upptök skjálftanna sunnan við Herðubreið eru á vinstri-handar sniðgengum með strik N40°-50°A þá eða með austlægari stefnu heldur en sprungusveimar Öskju og Kverkfjalla sitthvoru megin við svæðið (gulu svæðin á skjálftamynd). Sjá t.d. upptök skjálfta frá árunum 2005 og 2006. Herðubreið og Herðubreiðartögl eru móbergsstapi og móbergshryggur sem urðu til í eldsumbrotum undir jökli. Fáeinir smáskjálftar voru við Öskju.

Undir Vatnajökli mældust 10 jarðskjálftar og voru þeir allir undir 1 að stærð. Upptök þeirra voru við Lokahrygg, norðaustantil í Bárðarbungu, við Kistufell og Kverkfjöll.

Einn skjálfti var í Borgarfirði og annar suðvestan í Langjökli. Sá fyrri 0,4 að stærð og sá seinni 1,1 að stærð.

Mýrdalsjökull

Undir Mýrdalsjökli mældust 50 jarðskjálftar og þar af voru rúmlega 30 jarðskjálftar undir Kötluöskjunni. Tæplega 10 jarðskjálftar áttu upptök undir vestanverðum jöklinum og 4 við Hafursárjökul sunnan öskjunnar. Stærsti skjálftinn var 2 að stærð með upptök í Kötluöskjunni. Þann 18. maí kl. 15:11 mældist skjálfti um eða undir 0 að stærð með upptök um 5 km norður af Goðabungu, við Entukökul og er staðsettur á um 27 km dýpi.

Fáeinir smáskjálftar voru á Torfajökulssvæðinu, flestir undir vestanverðri öskjunni.

Gunnar B. Guðmundsson, Sigþrúður Ármannsdóttir og Þórunn Skaftadóttir.