	Veðurstofa Íslands Jarðeðlissvið

Jarðskjálftar 20120813 - 20120819, vika 33

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Í vikunni mældust um 230 jarðskjálftar. Stærsti skjálftinn, Mw=3,8 varð í austanverðri Kötluöskjunni, kl. 15:48 föstudaginn 17. ágúst og mældust nokkrir smærri skjálftar þar í kjölfar hans. Mesta virknin var undir sunnanverðu Kleifarvatni, en þar mældust um 60 skjálftar seinni hluta laugardags, þann 18. Þeir voru allir litlir.

Suðurland

Á Suðurlandi var virkni á Hestvatnssprungunni, en þar mældust 7 skjálftar, flestir á um 5 km dýpi og sá stærsti 1,3 að stærð. Í Ölfusinu var virkni á suðurhluta Krosssprungunnar á fimmtudag og föstudag þegar þar mældust 7 skjálftar á um 7 km dýpi, sá stærsti 0,9 að stærð. Vestan megin Ölfusár var líka virkni á stuttri sprungu, en þar urðu 10 skjálftar á um 4 km dýpi, allir í kringum 0 að stærð. Á Hengilssvæðinu mældust 9 skjálftar, allir undir 1 að stærð. Einn skjálfti, 1,3 að stærð mældist við Hafrafell, sunnan Vatnafjalla á miðvikudag.

Reykjanesskagi

Á Reykjanesskaganum var virknin aðallega undir sunnanverðu Kleifarvatni, en þar varð 64 skjálfta hrina á 5-7 km dýpi, frá kl. 15:51 á laugardaginn og var henni að mestu lokið um kl. 18. Smá virkni stóð þó fram yfir miðnættið. Stærsti skjálftinn var 1.7 að stærð, en flestir, eða 59 skjálftar voru á bilinu -0.5 til 1.

Norðurland

Úti fyrir Norðurlandi var virkni við Flatey, en þar urðu 7 skjálftar á fimmtudag, allir um 0,5 að stærð. Í Öxarfirðu mældust 12 skjálftar, sá stærsti 1,3 að stærð. Á Grímseyjarmisgenginu þar fyrir norðan urðu 11 skjálftar, flestir á stærðarbilinu 1-2.

Þrír skjálftar mældust norður í hafi, 100-550 km norðan Kolbeinseyjar. Þeir voru 2,2- 3,1 að stærð.

Hálendið

Á Þeistareykjum mældust 2 litlir skjálftar og 4 á Kröflusvæðinu. Skjálftarnir voru á 2-4 km dýpi og sá stærsti var 1 að stærð.

Við Öskju mældust 2 skjálftar, 0,4 og 1,2 að stærð. Annar þeirra var djúpur, eða á 18 km dýpi.

Suður af Herðubreið, í námunda við Herðubreiðartögl mældust 14 skjálftar. Þeir voru flestir í kringum 1 að stærð.

Í Vatnajökli voru 2 skjálftar í Kverkfjöllum og 2 við Kistufell, við Bárðarbungu 4 skjálftar og í námunda við Hamarinn voru 2. Einn skjálfti var norðan Grímsvatna og 2 sunnan Grímsvatna við Þórðarhyrnu. Allir þessir skjálftar voru um eða undir 1 að stærð.

1 skjálfti varð norðan Tungnafellsjökuls.

Í sunnanverðum Langjökli urðu 3 skjálftar, sá stærsti 2,4 að stærð.

Á Torfajökulssvæðinu, í námunda við Landmannalaugar urðu 2 skjálftar, annar þeirra tælplega 2 að stærð.

Mýrdalsjökull

Í Mýrdalsjökli mældust 57 skjálftar, 31 inni í öskjunni og 23 vestan hennar og í námunda við Goðabungu. Goðabunguskjálftarnir voru allir við yfirborð og flestir undir 1 að stærð.

21 skjálfti varð undir og í námunda við ketil númer 13 og komu flestir í kjölfar Mw=3.8 skjálfta kl. 15:48 á föstudag. Tveir Eftirskjálftanna voru yfir 2 að stærð. Hinir voru á stærðarbilinu 0.5 til 2. Allir skjálftarnir undir katli 13 voru við yfirborð.

4 skjálftar, í kringum 1-2 að stærð mældust í námunda við ketil númer 10 og voru þeir einnig allir við yfirborð.

Kristin S Vogfjörð