	Veðurstofa Íslands Jarðeðlissvið

Jarðskjálftar 20120917 - 20120923, vika 38

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Rúmlega 640 jarðskjálftar mældust með mælakerfi Veðurstofu Íslands í vikunni. Skjálftahrina var syðst í Eyjafjarðarál úti fyrir Norðurlandi, fjórir jarðskjálftar mældust yfir 4 að stærð og þeir fundust víða á Norðurlandi. Alls á fimmta hundrað jarðskjálftar hafa verið staðsettir þar. Fleiri smáskjálftar mældust á þekktum sprungum á Reykjanesskaga og á Suðurlandi, smáhrina var við Herðubreiðartögl í byrjun vikunnar.

Norðurland

Jarðskjálftahrina var syðst í Eyjafjarðarál milli Húsavíkur-Flateyjarmisgengisins og sigdals suður af Kolbeinseyjarhrygg. Alls á fimmta hundrað jarðskjálftar hafa verið staðsettir. Stærstu skjálftarnir voru yfir 4 að stærð þann 19. september kl. 07:57 og 08:28, og 20. september kl. 09:27 og 19:42. Þeir fundust víða á Norðurlandi, allt frá Sauðárkróki, Siglufirði, Ólafsfirði, Dalvík, Akureyri, að Húsavík og nágrenni. Einnig hafa mælst nokkrir skjálftar yfir 3 að stærð. Í lok vikunnar var aftur rólegt þar. Smelltu hér til að lesa samantekt Veðurstofunnar um jarðskjálftahrinu og að sjá upptakakort.

Um fimmtán smáskjálftar mældust í nágrenni Flateyjar, þrír norðaustan Grímseyjar og um tíu í Öxarfirði. Allir voru minni en 2 að stærð. Þrír jarðskjálftar áttu upptök sunnan Kolbeinseyjar, sá stærsti var 2,6 að stærð þann 18. september. Einn smáskjálfti mældist í Þeistareykjum og tveir í Kröfluöskjunni.

Suðurland

Á Suðurlandi mældust tæplega 30 skjálftar á þekktum jarðskjálftasprungum milli Þrengsla og Heklu, allir minni en 1,5 að stærð. Þar af voru 15 staðsettir á Ölfussvæðinu. Í byrjun vikunnar var smáhrina í nágrenni Húsmúla, stærsti skjálftinn þar var 1,3 stig þann 17. september kl. 22:53.

Reykjanesskagi

Á Reykjanesskaga áttu rúmlega 30 skjálftar upptök í þekktum jarðskjálfta- og jarðhitasvæðum í nágrenni Krýsuvíkur, Svartsengis og Bláfjalla. Nokkrir smáskjálftar mældust skammt vestan Geitafells á Reykjanesskaga. Þessir skjálftar voru nokkru sunnar en þeir sem mældust í jarðskjálftahrinunni í Bláfjöllum í lok ágúst. Stærsti skjálftinn á Reykjanesskaga var 2,1 að stærð þann 18. september kl. 04:53 vestan Geitafells. Á Reykjaneshrygg voru þrír skjálftar staðsettir í kringum Geirfugladrang, sá stærsti var 2,0 stig.

Mýrdalsjökull

Í Mýrdalsjökli mældust rúmlega 60 jarðskjálftar, þar af voru 18 staðsettir inni Kötluöskjunni, flestir í nágrenni Goðalands og Hafursárjökuls. Stærsti skjálftinn var 1,9 að stærð norðan Hábungu þann 17. september kl. 08:41.

Hálendið

Á hálendinu var tiltölulega rólegt. Í byrjun vikunnar var smáhrina við Herðubreiðartögl, um 15 skjálftar voru staðsettir þar, allir minni en 1,0 stig. Nokkrir smáskjálftar mældust í nágrenni Öskju og Kistufells. Stærsti skjálftinn var 2,1 að stærð í Kverkfjöllum.

Martin Hensch