	Veðurstofa Íslands Jarðeðlissvið

Jarðskjálftar 20121001 - 20121007, vika 40

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Tæplega 300 jarðskjálftar voru staðsettir í vikunni og 3 líklegar sprengingar. Stærsti skjálftinn var um 4 að stærð þann 5. október kl. 19:42 með upptök suðaustan við Bláfjöllin eða um 3 km norðvestan við Geitafell. Skjálfti að stærð 3,1 var undir norðanverðri Kötluöskjunni þann 3. október. Þrír jarðskjálftar um 3 að stærð mældust í skjálftahrinum austan og norðan við Grímsey.

Suðurland

Á Hengilssvæðinu voru fáeinir smáskjálftar.
Einnig voru nokkrir smáskjálftar í Ölfusinu, við Hestfjall og í Landssveit. Allir þessir skjálftar voru undir 1 að stærð.

Reykjanesskagi

Þann 4. október mældut 7 jarðskjálftar með upptök undir Vífilsfelli. Stærsti skjálftinn þar var 1, 5 að stærð.
Suðaustan við Bláfjöllin eða um 2-3 km norðvestan við Geitafell var jarðskjálftahrina í vikunni. Stærsti skjálftinn var um 4 að stærð þann 5. október kl. 19:42. Hann fannst vel víða á Höfuðborgarsvæðinu, í Þorlákshöfn og einnig á Akranesi. Sama dag kl. 18:01 var skjálfti um 3 að stærð á sama stað og fannst hann einnig. Frá vikubyrjun og fram til 4. október mældust 10 jarðskjálftar og frá 5. október til loka vikunnar mældust 60 jarðskjálftar á þessu sprungusvæði.
Upptakagreining skjálftanna bendir til þess að meginskjálftavirknin sé á nær lóðréttu brotaplani með strikstefnu um V7°N ( eða N173°A). Einnig má sjá NA-SV sprungustefnur.

Á Krýsuvíkursvæðinu mældust 14 jarðskjálftar. Flestir þeirra áttu upptök undir norðanverðu Kleifarvatni þann 7. október. Þeir voru allir undir 0,5 að stærð.

Einn skjálfti tæpleg 1 að stærð var við Reykjanestá og annar um 2 að stærð um 11 km suðsuðvestur af Eldeyjarboða á Reykjaneshrygg.

Norðurland

Rúmlega 100 jarðskjálftar mældust úti fyrir Norðurlandi.
Mesta skjálftavirknin var um 20 km austur af Grímsey og mældust þar alla vikuna 56 skjálftar. Stærstu skjálftarnir þar voru um 3 að stærð þann 1. okt. kl. 03:03 og þann 3. okt. kl. 20:23.
Seinni hluta vikunnar var jarðskjálftahrina með um 24 skjálftum sem átti upptök um 20 km norðnorðaustur af Grímsey. Stærsti skjálftinn þar var 3,1 stig þann 5. okt. kl. 11:35. Um 8 jarðskjálftar áttu upptök syðst í Eyjafjarðarál og var stærsti skjálftinn þar 2,9 að stærð þann 1. október. Allir aðrir skjálftar þar voru um eða undir 2 að stærð.
Rúmlega 10 jarðskjálftar voru inn í Öxarfirði og voru þeir allir minni en 1,4 að stærð. Tveir skjálftar voru á Skjálfanda milli Flateyjar og Húsavíkur og voru báðir minni en 1 að stærð
Við Þeistareyki mældust 3 smáskjálftar og við Kröflu mældust 7 smáskjálftar allir minni en 1 að stærð.

Hálendið

Undir og við Vatnajökul mældust rúmleg 10 jarðskjálftar. Flestir áttu upptök við Kistufell en einnig voru skjálftar á Lokahrygg og einn við Öræfajökul. Stærstu skjálftarnir voru um 1,3 að stærð.

Við Öskju og Herðubreið voru um 16 jarðskjálftar. Þeir voru allir undir 1,4 að stærð.

Einn skjálfti, tæplega 1 að stærð var við Geitlandsjökul í Langjökli

Mýrdalsjökull

Um 30 jarðskjálftar mældust undir Mýrdalsjökli og þar af voru 14 skjálftar undir vesturhluta jökulsins við Goðabungu þar sem stærsti skjálftinn var 1,4. Undir Kötluöskjunni mældust 13 jarðskjálftar. Stærsti skjálftinn 3,1 að stærð átti upptök undir norðurhluta öskjunnar þann 3. okt. kl. 08:26. Þrír smáskjálftar voru við Hafursárjökul og einn við Sólheimajökul.

Á Torfajökulssvæðinu mældust 4 jarðskjálftar sá stærsti 1,8 að stærð.

Gunnar B. Guðmundsson