	Veðurstofa Íslands Jarðeðlissvið

Jarðskjálftar 20121105 - 20121111, vika 45

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Hátt í 400 jarðskjálftar voru staðsettir með SIL-mælakerfi Veðurstofunnar í þessari viku. Mesta virknin var líkt og síðustu þrjár vikurnar í Eyjafjarðarál úti fyrir Norðurlandi en talsvert hefur dregið úr virkni þar þessa vikuna. Stærsti skjálfti vikunnar varð í hádeginu laugardaginn 10. nóvember í Eyjafjarðarál, 3,5 að stærð.

Suðurland

Við Húsmúla á Hellisheiði mældust sex skjálftar og tveir við Nesjavallavirkjun, stærsti skjálftinn var 1,7. Um tugur dreifðra smáskjálfta mældist í Ölfusi og á Suðurlandsundirlendi.

Reykjanesskagi

Rólegt var á Reykjanesskaganum en þar mældust einungis sex skjálftar: fjórir við suðaustanvert Kleifarvatn, einn við Brennisteinsfjöll og annar á Bláfjallasvæðinu. Allir voru skjálftarnir innan við tvö stig.

Norðurland

Ennþá er talsverð skjálftavirkni í Eyjafjarðarál. Um helmingur virkni vikunnar eða um 200 skjálftar mældust á svæðinu, langflestir í nágrenni við upptakasvæði 5,6 skjálftans 21. október. Stærstu skjálftar vikunnar urðu 10. nóvember kl. 12:12 um 20 km NNA af Siglufirði og var hann 3,5 að stærð og kl. 13:08 um 20 km NV af Gjögurtá og var hann 2,8 að stærð. Nokkur virkni var í Öxarfirði í vikunni og mældust þar um 60 skjálftar sá stærsti var 2,1 að stærð.

Hálendið

Lítil virkni var á hálendinu í vikunni. Tveir skjálftar mældust rétt norðan við Álftadalsdyngju og einn við Trölladyngju. Nokkrir skjálftar mældust sunnan Bárðarbungu og einnig við Kistufell.

Mýrdalsjökull

Nokkuð rólegt var í Mýrdalsjökli en þar voru staðsettir tæplega 30 skjálftar sem er svipaður fjöldi og í síðustu viku. Innan öskjunnar voru 16 skjálftar og í suðurhluta hennar var stærsti skjálftinn sem varð í jöklinum, 1,5.
Heldur líflegra var á Torfajökulssvæðinu en undanfarnar vikur og mældust þar 16 skjálftar. Mesta virknin var í upphafi og við lok vikunnar. Stærsti skjálftinn varð á sunnudeginum 11. nóvember og var hann 2,4 að stærð.
Einn lítill skjálfti mældist í Geitlandsjökli í Langjökli og annar skammt suður af Hlöðufelli.

Sigþrúður Ármannsdóttir , Benedikt G. Ófeigsson og Þórunn Skaftadóttir.