Veðurstofa Íslands Jarðeðlissvið

Jarðskjálftar 20130513 - 20130519, vika 20

[Skjálftalisti]

[Fyrri vika]

[Næsta vika]

[Aðrar vikur]

[Jarðeðlissvið]

PostScript-skrá
Forrit sem les PostScript-skrár má nálgast hér

Sérkort af

Lýsing á skjálftavirkni vikunnar

Tæplega 200 jarðskjálftar mældust í vikunni og telst vikan því róleg miðað við fyrri viku þegar snörp skjálftahrina varð á Reykjaneshrygg og yfir 1000 skjálftar mældust. Stærsti skjálfti nærri landi þessa vikuna var í Eyjafjarðarál, 3,0, en annar stærri, sem var um fjögur stig, varð langt suður á Reykjaneshrygg á föstudaginn. Mesta virknin var í Tjörnesbrotabeltinu líkt og oft áður.

Suðurland

Um tugur smáskjálfta mældist á Hengilssvæðinu og í Ölfusi auk nokkurra á Suðurlandsundirlendi.

Reykjanesskagi

Á Reykjanesskaga mældist á þriðja tug skjálfta, flestir vestan og austan við Kleifarvatn. Tveir skjálftar mældust undir Brennisteinsfjöllum, báðir á um sjö kílómetra dýpi. Sá stærri var 1,4 að stærð og var það jafnframt stærsti skjálftinn á Reykjanesskaganum í vikunni. Um tugur eftirskjálfta mældist á Reykjaneshrygg á svipuðum slóðum og skjálftahrinan var í síðustu viku. Tveir skjálftar mældust síðan lengst suður á Reykjaneshrygg, báðir yfir þremur stigum að stærð og sá stærri nær fjórum.

Norðurland

Ríflega 80 skjálftar mældust úti fyrir Norðurlandi í vikunni. Um helmingur þeirra var austan Grímseyjar, 20 í Eyjafjarðarál og aðrir dreifðust um svæðið. Stærsti skjálftinn var þrjú stig í Eyjafjarðarál og var það einnig stærsti skjálfti sem mældist nærri landi.

Hálendið

Nokkrir skjálftar mældust við Bárðarbungu og Kistufell í Vatnajökli og einn smáskjálfti undir vestari Skaftárkatli. Stærsti skjálftinn var 1,4 við Kistufell.
Rólegt var á svæðinu norðan Vatnajökuls en þar mældust sex skjálftar, þar af tveir við Öskju.

Mýrdalsjökull

Undir Mýrdalsjökli mældust rúmlega 20 skjálftar þar af um helmingur í sunnanverðri Kötluöskjunni. Stærsti skjálfti innan öskjunnar var 1,3, og 1,4 í vestanverðum jöklinum.
Einn skjálfti, 0,8 að stærð, mældist undir Eyjafjallajökli og á Torfajökulssvæðinu mældust 10 skjálftar, stærsti 1,7.

Sigþrúður Ármannsdóttir