	Veðurstofa Íslands Jarðeðlissvið

Jarðskjálftar 20130617 - 20130623, vika 25

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Rúmlega 380 jarðskjálftar voru staðsettir með SIL-mælakerfi Veðurstofu Íslands í vikunni, og voru þeir allir minni en 3 að stærð. Talsverð smáskjálftavirkni var í Tjörnesbrotabeltinu, á Vatnajökulssvæðinu og undir Mýrdalsjökli, tveir smáskjálftar mældust í Heklu.

Reykjanesskagi

Á Reykjanesi mældust um 30 jarðskjálftar, þar af voru tæplega 20 með upptök á þekktum sprungum og jarðhitasvæðum á Reykjnesskaga og um 10 á Reykjaneshrygg. Allir voru innan við 2 að stærð.

Suðurland

Um tugur jarðskjálfta voru staðsettir í Ölfusi og við Þrengsli, sá stærsti var 2,2 að stærð þann 19. júní kl. 08:41. Á Suðurlandsundirlendinu urðu tæplega 15 smáskjálftar með upptök á þekktum jarðskjálftasprungum.

Mýrdalsjökull

Rúmlega 55 jarðskjálftar voru staðsettir undir Mýrdalsjökli í vikunni, þar af um helmingur inni í Kötluöskjunni. Nokkur virkni var líka við Goðabungu og Hafursárjökul. Stærstu skjálftarnir voru um 2,3 að stærð, einn norðan Hábungu þann 21. júní kl. 15:21 og tveir við Goðabungu þann 19. júní kl. 17:02 og þann 21. júní kl. 08:32. Smávirkni var suðaustan Goðabungu á 5-7 km dýpi, en allir skjálftar inni í öskjunni voru grunnir og líklega tengdir jarðhita.

Hálendið

Talsverð jarðskjálftavirkni var undir Vatnajökli í vikunni, um 70 skjálftar mældust þar. Djúpar hrinur (15-25km) áttu upptök austur af Bárðarbungu, samtals voru 30 skjálftar staðsettir þar, sá stærsti um tvö stig. Tæplega 25 ísskjálftar mældust undir suðvestanverðum Vatnajökli. Mælanleg skjálftavirkni á þessum slóðum hefur verið fyrirboði nokkurra Skaftárhlaupa þannig að áframhaldandi skjálftavirkni gæti bent til þess að hlaupvatn sé að renna í átt að jökulsporðinum. En þó er engin mælanleg aukning á rafleiðni í Skaftá eða Hverfisfljóti hingað til (24. júní, kl. 13:00). Nokkrir smáskjálftar mædust í nágrenni Kistufells. Tólf jarðskjálftar mældust austur af Öskju, allir innan við eitt stig. Rúmlega 30 skjálftar voru staðsettir nærri Herðubreið, sá stærsti mældist 1,6 stig þann 21. júní kl. 13:03.

Norðurland

Nokkur virkni var í Tjörnesbrotabeltinu, um 30 jarðskjálftar mældust við Eyjafjarðarál og um 10 í nágrenni Flateyjar og í Skjálfandaflóa. Í Grímseyjarbeltinu áttu rúmlega 50 skjálftar upptök, milli Öxarfjarðar og Kolbeinseyjar. Stærsti skjálftinn mældist 2,6 að stærð þann 22. júní og var hann staðsettur um 10 km norður af Kolbeinsey. Smáskjálftavirkni var líka við Þeistareyki og Kröflu.

Martin Hensch