	Veðurstofa Íslands Jarðeðlissvið

Jarðskjálftar 20131202 - 20131208, vika 49

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Vikan var tíðindalítil, einungis mældust 125 jarðskjálftar og engar skjálftahrinur. Tveir skjálftar náðu tveimur stigum, annar norðaustan Herðubreiðar, hinn í vestanverðum Mýrdalsjökli og voru það stærstu skjálftar sem mældust í vikunni. Mikið frost var um allt land síðari hluta vikunnar og við slíkar aðstæður sjást frostbrestir vel á mælum hálendisstöðvanna.

Suðurland

Nokkrir skjálftar urðu við Húsmúla á Hellisheiði og á Hengilssvæðinu. Rólegt var á Suðurlandsundirlendinu.

Reykjanesskagi

Nokkrir smáskjálftar mældust við Kleifarvatn en enginn á Reykjaneshrygg. Einn lítill skjálfti mældist við Vífilsfell þar sem mikil hrina varð fyrir hálfum mánuði.

Norðurland

Rúmlega 20 jarðskjálftar mældust í Tjörnesbrotabeltinu, dreifðir í tíma og rúmi, og fáeinir á svæðinu við Þeistareyki.

Hálendið

Um 15 skjálftar mældust í Vatnajökli, þar af fimm undir Esjufjöllum og Breiðamerkurjökli. Stærsti skjálftinn varð um miðja viku í suðvestanverðum Vatnajökli, 1,7 að stærð. Tæplega 20 skjálftar mældust á svæðinu norðan Vatnajökuls, rúmlega helmingur við Öskju, stærsti 1,5. Nokkrir skjálftar mældust fyrri hluta vikunnar við norðaustanverða Herðubreið. Stærsti skjálftinn varð aðfaranótt miðvikudagsins, 2,0 að stærð. Engir skjálftar mældust við Lang- eða Hofsjökul.

Mýrdalsjökull

Um 40 skjálftar mældust í Mýrdalsjökli þar af um 15 innan Kötluöskjunnar. Rúmur tugur varð í vestanverðum jöklinum, á svæðinu vestur af Goðabungu, stærsti tvö stig. Litlu færri mældust við Hafusárjökul í sunnanverðum jöklinum, allir smáir. Nokkrir skjálftar urðu á Torfajökulssvæðinu, stærsti 1,8.

Sigþrúður Ármannsdóttir