	Veðurstofa Íslands Jarðeðlissvið

Jarðskjálftar 20150928 - 20151004, vika 40

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Í vikunni voru staðsettir tæplega 400 jarðskjálftar. Stærsti skjálftinn mældist 3,1 stig og átti upptök við suðausturbrún Bárðarbunguöskjunnar. Viðvarandi jarðskjálftahrina var um 6 km suður af Skarðsfjalli á Suðurlandi alla vikuna. Tæplega 20 skjálftar mældust suður af Reykholtsdal í Borgarfirði. Hlaup kom úr Eystri Skaftárkatlinum í vikunni.

Suðurland

Um 7 skjálftar voru á Hengilssvæðinu. Sá stærsti 1,9 að stærð með upptök við Hrómundartind. Allir hinir voru undir 1 að stærð.

Jarðskjálftahrina var um 6 km suður af Skarðsfjalli, norðan við Húsagarð í Landsveit. Mest var skjálftavirknin dagana 28.-30. september. Upptök skjálftanna eru á tiltölulega samþjöppuðu svæði og á um 7 km dýpi. Í þessari viku mældust 120 skjálftar en hrinan hófst laugardaginn 26.9. Stærsti skjálftinn mældist 2,5 að stærð þann 28.9. kl. 17:42. Brotlausn hans sýnir sniðgengislausn. Tæplega 30 þeirra voru á stærðarbilinu 1 til 2 og um 90 undir 1 að stærð. Af afstæðum staðsetningum þeirra þá virðast þeir vera á nærri lóðriéttu brotaplani með strik 60° austan við norður. Þeir eru líkega við botn brotgjörnu skorpunnar. Upptök skjálftanna eru nálægt suðurenda sprungunnar sem myndaðist í fyrsta og stærsta skjálftanum í skjálftaröðinni frá 1896.
Í byrjun ágústs 2013 var smáhrina á þessum slóðum.

Nokkrir smáskjáltar mældust í Ölfusi, við Hestfjall og í Holtum.

Reykjanesskagi

Þrír jarðskjálftar voru nyrst á Reykjaneshryggnum. Upptök eins þeirra var við Geirfugladrang og hinna við Eldey. Þeir voru allir undir 2 að stærð. Í lok vikunnar mældust tveir skjálftar á hryggnum, nálægt 62.5°N og var sá stærri 2,4 að stærð.

Lítil skjálftavirkni var á Reykjanesskaganum. Tveir stærstu skjálftarnir voru 2,1 og 1,8 að stærð og voru tæplega 5 km norður af Grindavík.
Stakir smáskjálftar allir undir 1 að stærð voru á Krísuvíkursvæðinu, við Brennisteinsfjöll, Vífilsfell og Bláfjöll.

Norðurland

Úti fyrir Norðurlandi mældust tæplega 40 jarðskjálftar. Tveir og jafnframt stærstu skjálftarnir voru við Kolbeinsey og mældust þeir 2,6 og 2,3 að stærð.
Upptök flestra skjálftanna voru á Grímseyjarbeltinu frá Grímsey og inn í Öxarfjörð. Innan við 10 skjálftar voru á Húsavíkur-Flateyjarmisgenginu. Einn skjálfti af stærð 2,4 var við 68°N á Kolbeinseyjarhrygg. Smáskjálftar mældust við Bjarnarflag, Víti og Þeistarreyki.

Hálendið

Undir og við Vatnajökul mældust 80 jarðskjálftar. Þar af voru um 30 í Bárðarbunguöskjunni og 16 í ganginum við Dyngjujökul. Stærsti skjálftinn mældist 3,1 að stærð þann 3.10. kl. 15:41 og átti hann upptök við suðausturbrún Bárðarbunguöskjunnar. Stærsti skjálftinn í ganginum var 1,6 stig. Tveir skjálftar á um 17 km dýpi voru suðaustan við öskjuna þann 3.10. kl. 03:30 og kl. 03:32.

Við Tungnafellsjökul voru um 15 skjálftar. Sá stærsti mældist 2,2 stig þann 1.10. kl. 02:56.

Hlaup úr Eystri-Skaftárkatlinum varð í vikunni. Ketillinn byrjaði að síga aðfaranótt sunnudagsins 27.9. og hlaupið kom fram við vatnshæðarmæli við Sveinstind aðfaranótt 1. október. Fremur fáa skjálfta var hægt að staðsetja við framhlaup hlaupsins undir jöklinum. Fáeinir skjálftar mældust í nágrenni ketilsins og í Skatftárjökli. Þegar ketillinn hafði sigið verulega þann 1. október þá byrjuðu óróahviður frá honum sem mældust víða á jarðskjálftamælistöðvum. Fyrsta hviðann byrjaði um hádegið þann 1. október eins og sést á óróariti (Einar Kjartansson) frá skjálftastöðvunum í Grímsvötnum (grf), Vonarskarði (von), Innri-Eyra (iey) og Jökulheimum (jok). Óróinn jókst svo aftur síðdegis og stærsta hviðann varð um kl. 01:15 þann 2.10. Þessi órói fjaraði síðan út laugardagsmorguninn 3.10. Á óróariti frá Grímsvötnum (grf) sem sýnir 11 mínútna miðgildissíuð skjálftagögn má ieinnig sjá þessar óróahviður. Líklegasta skýringin á þessum óróahviðum er að þær verði vegna suðu við þrýstingslækkunina í katlinum.

Við Öskju og Herðubreið voru tæplega 50 jarðskjálftar. Stærsti skjálftinn mældist 2,4 að stærð þann 4.10. kl. 15:02 og haði hann upptök um 5 km norðan við Herðubreið.

Við Hveravelli og Þjófadali mældust tæplega 10 skjálftar. Sá stærsti var 1,9 stig.
Einn skjálfti var við Geitlandsjökul 1,8 að stærð.
Tæplega 20 skjálftar mældust suður af Reykholtsdal um 12 km norðvestur af Okinu í Borgarfirði. Stærsti skjálftinn mældist 2,6 stig þann 4.10. kl. 13:24.

Mýrdalsjökull

Um 20 skjálftar mældust undir Mýrdalsjökli. Þar af voru 8 undir vesturhlutanum og og 6 í Kötluöskjunni. Við Hafursárjökull voru 4 skjálftar og 2 í Kötlujökli. Stærsti skjálftinn var 1,6 að stærð þann 2.10. kl. 01:12 og átti upptök undir vesturhluta jökulsins.
Einn skjálfti um 1 að stærð var undir toppgíg Eyjafjallajökuls.

Tíu skjálftar voru á Torfajökulssvæðinu. Sá stærsti 1,6 að stærð (Mlw). Upptök margra þessara skjálfta eru ekki mjög vel ákvörðuð.

JarðvaktGunnar B. Guðmundsson, Bryndís Gísladóttir,Hildur María Friðriksdóttir og Salóme Bernharðsdóttir