Veðurstofa Íslands
Jarðeðlissvið

Jarðskjálftar 20170612 - 20170618, vika 24

[Skjálftalisti] [Fyrri vika] [Næsta vika] [Aðrar vikur] [Jarðeðlissvið]

PostScript-skrá
Forrit sem les PostScript-skrár má nálgast hér

Sérkort af

[Suðurlandi] [Reykjanesi] [Hengilssvæðinu] [Bárðarbungu] [Lang-og Hofsjökli] [Öskju] [Mýrdals- og Eyjafjallajökli] [Norðurlandi]

Lýsing á skjálftavirkni vikunnar

Um 700 jarðskjálftar voru staðsettir í vikunni , svipað og vikuna á undan. Stærsti skjálftinn á landinu mældist 3,6 stig þann 12. júní kl. 06:56 með upptök við norðurbrún Bárðarbunguöskjunnar. Sunnudaginn 18. júní kl. 18:30 mældist skjálfti 3,2 að stærð við suðausturbrún Kötluöskjunnar, upp af Kötlujökli. Tveir skjálftar af stærð 2,6 mældust undir Öræfajökli þann 13. og 16. júní.

Suðurland

Um 40 skjálftar voru á Suðurlandsundirlendinu. Þeir voru allir minni en 0.7 að stærð og upptök þeirra dreifððust um Ölfus, Flóann, Skeiðin, Holtin og Landsveit.

Um 10 skjálftar voru á Hengilssvæðinu, sá stærsti 1,3 að stærð.

Reykjanesskagi

Rúmlega 50 smáskjálftar voru á Reykjanesskaganum. Upptök þeirra voru við Reykjanes, Fagradalsfjall og á Krísuvíkursvæðinu. Einnig voru smáskjálftar í Brennisteinsfjöllum og við Vífilsfell en þar var smáskjálftahrina með um 15 skjálfta milli kl. 7 og 9 þann 13.6. Stærsti skjálftinn á Reykjanesskaganum var tæp 2 stig með upptök við Krísuvík þann 18.6. kl. 15:49.

Fimm skjálftar voru nyrst á Reyjaneshrygg, sá stærsti 1,8 stig.

Norðurland

Úti fyrir Norðurlandi á svonefndu Tjörnesbrotabelti voru rúmlega 200 skjálftar. Flestir þeirra eða um 100 áttu upptök við Flatey á Skjálfanda og mældust þeir stærstu um 1,9 stig (sjá einngi hér neðar). Um 45 skjálftar voru við Grimsey, sá stærsti 1,6 stig suiðaustur af eynni. Svipaður fjöldi mældist inni í Öxarfirði og þar voru tveir stærstu skjálftarnir 2,3 stig. Skjálftar voru einnig úti fyrir mynni Eyjafjarðar, á Húsavíkur-Flateyjarmisgenginu.

Langvarandi smáskjálftahrina um 7 km norðaustur af Flatey á Skjálfanda hefur verið í gangi frá byrjun mars á þessu ári. Stærsti skjálftinn var 2,5 stig en meirihluti skjálftanna hefur verið undir 1 að stærð. Hátt í átta hundruð smáskjáftar hafa mælst á þessum stað frá byrjun mars. Afstæðar staðsetningar (Ragnar Slunga) benda til þess að smáskjálftarnir séu á amk tveimur mismunandi brotaplönum. Annað brotplanið er norðlægt og nær lóðrétt. Hitt er með NV-SA stefnu (ca N145°A)og hallar um 60°-70° til suðvesturs. Skjálftarnir eru á um 10.5-11.5 km dýpi. Það virðist að skjálftarnir hafi grynnkað lítið eitt með tíma og færst aðeins norðar. Líklegast er að einhvers konar vökvi (fluids) sé að þrýsta sér upp á mótum þessara sprunguflata og valda þessum smáskjáftum.

Fáeinir smáskjálftar voru við Þeistarreyki og Víti.

Hálendið

Tæplega 170 jarðskjálftar voru undir og við Vatnajökul. Undir Bárðarbunguöskjunni voru tæplega 70 jarðskjálftar og stærsti skjálftinn mældist 3,6 stig við norðurjaðar öskjunnar þann 12.6. kl. 06:56. Í bergganginum voru um 30 skjálftar, allir minni en 1 að stærð. Nokkrir djúpir skjálftar voru suðaustur af Bárðarbunguöskjunni og einnig amk einn við Trölladyngju. Við Tungnafellsjökul voru 16 skjálftar, sá stærsti 1,3 að stærð. Undir og við Öræfajökul mældust rúmlega 30 skjálftar. Stærstu skjálftarnir voru 2,6 að stærð þann 13.6. kl. 11:04 og þann 16.6. kl. 16:02. Nokkrir smáskjálftar voru undir Grímsvötnum.

Við Öskju og Herðubreið voru tæplega 60 skjálftar. Sá stærsti 2,1 sig með upptök norðaustur af Töglunum þann 18:6. kl. 22.17.

Borgarfjörður

Frá byrjun maí hafa verið viðvarandi skjálftar norðvestan við Skotmannsfell, innarlega í Lundarreykjadal í Borgarfirði. Stærstu skjálftarnir eru um 2,5 að stærð. Afstæðar staðsetningar (Ragnar Slunga) sýna að skjálftarnir eru flestir á brotaplani með strikstefnu N38°A og halla um 71° til norðvesturs. Brotlausnir sýna siggengishreyfingar þannig að vestari hlutinn sígur niður en sá eystri rís upp. Skjálftarnir eru aðllega á tveimur dýptarbilum, milli 3.0-3.5 km og 4.0-4.5km. Svona jarðskjálftahrinur eru ekki óalgengar á þessu svæði t.d. voru skjálftahrinur á þessum slóðum í janúar 1996, júlí 2000 og apríl 2009. Stór jarðskjálftahrina var í Borgarfirði í júní og júlí 1974. Talið er að í Borgarfirði hafi áður verið jarðskjálftabrotabelti milli Snæfellsnesrekbeltisins og Reykjanes-Langjökuls rekbeltisins (Maryam Khodaya og Páll Einarsson, 2002). Í Borgarfirði eru þekkt jarðhitasvæði með hverum og þar á meðal er Lundarreykjadalur með Englandshver sem liggur suðvestur af skjálftaþyrpingunni.

Mýrdalsjökull

Undir Mýrdalsjökli mældust um 70 skjálftar. Þar af voru tæpir 60 skjálftar undir Kötluöskjunni en hinir undir vesturhluta jökulsins. Stærsti skjálftinn mældist 3,2 stig þann 18.6. kl. 18:30 ,með upptök við suðausturjaðar Kötluöskjunnar, upp af Kötlujöklinum. Um tíu mínutum fyrr mældust þar einnig 2 skjálftar af stærð 2,8. Skjálftavirknin i vikunni var aðallega sunnan til í Kötluöskjunni.

Á Torfajökulssvæðinu mældust tæplega 20 jarðskjálftar. Upptök margra þeirra er ekki mjög vel ákvörðuð. Stærsti skjálftinn varð þann 14.06. kl. 11:39 við vesturjaðar öskjunnar og mældist hann 1,6 stig. Allir aðrir voru undir 1 að stærð.

Jarðvakt