Veðurstofa Íslands
Jarðeðlissvið

Jarðskjálftar 20171106 - 20171112, vika 45

[Skjálftalisti] [Fyrri vika] [Næsta vika] [Aðrar vikur] [Jarðeðlissvið]

PostScript-skrá
Forrit sem les PostScript-skrár má nálgast hér

Sérkort af

[Suðurlandi] [Reykjanesi] [Hengilssvæðinu] [Bárðarbungu] [Lang-og Hofsjökli] [Öskju] [Mýrdals- og Eyjafjallajökli] [Norðurlandi]

Lýsing á skjálftavirkni vikunnar

Tæplega 360 jarðskjálftar mældust með SIL-mælakerfi Veðurstofu Íslands í vikunni, sem er töluvert færri en í síðustu viku þegar um 500 skjálftar mældust. Stærsti skjálfti vikunnar var 3,0 að stærð í Öxarfirði þann 8. nóvember kl 05:49 og fannst hann á Kópaskeri. Færri jarðskjálftar mældust á flestum svæðum miðað við í síðustu viku. Rúmlega 20 skjálftar mældust í Öræfajökli, sem er töluvert færri en í síðustu viku þegar um 80 jarðskjálftar mældust þar. Heldur færri jarðskjálftar mældust undir Mýrdalsjökli í vikunni, en heldur fleiri í Bárðarbungu samanborið við síðustu viku. Einn smáskjálfti mældist í Heklu.

Suðurland

Rúmlega 70 jarðskjálftar mældust á Suðurlandi í vikunni, sem eru töluvert færri en vikuna á undan, þegar um 100 jarðskjálftar mældust. Munar þar mestu um jarðskjálftahrinu, sem varð í Flóanum austan við Selfoss í síðustu viku. Allir skjálftarnir voru undir 2 að stærð. Um 20 skjálftar urðu í smá hrinu 12. nóvember suðaustur af Bláfjöllum. Um 20 jarðskjálftar mældust á Hengilssvæðinu. Einn smáskjálfti mældist í Heklu.

Reykjanesskagi

Rúmlega 20 jarðskjálftar mældust á Reykjanesskaga, heldur færri en vikuna á undan. Flestir urðu á svæðinu frá Kleifarvatni og vestur að Reykjanestá. Tveir skjálftar mældust úti á Reykjaneshrygg, báðir undir 2 að stærð.

Norðurland

Tæplega 90 jarðskjálftar mældust úti fyrir Norðurlandi í vikunni, örlítið fleiri en vikuna á undan, þegar tæplega 80 skjálftar mældust. Stærsti skjálftinn var 3,0 að stærð í Öxarfirði þann 8. nóvember kl 05:49, en hann var jafnframt stærsti skjálfti vikunnar. Flestir skjálftarnir mældust á Grímseyjarbeltinu eða tæplega 80. Þar af mældust tæplega 30 í Öxarfirði og rúmlega 40 við Grímsey, sá stærsti 2,2 stig. Um 14 jarðskjálftar mældust á Húsavíkur-Flateyjar misgenginu allir undir 2 að stærð. Tveir smáskjálftar mældust við Kröflu.

Hálendið

Tæplega 70 jarðskjálftar mældust undir Vatnajökli öllum í vikunni, sem er talsvert færri en í síðustu viku, þegar 120 skjálftar mældust. Rúmlega 20 skjálftar mældust í Öræfajökli, sem eru mun færri en í síðustu viku, þegar 80 skjálftar mældust þar. Stærsti skjálftinn var 2,0 að stærð. Í Bárðarbungu mældust 20 skjálftar í vikunni, sá stærsti 2,7 að stærð þann 10. nóvember. Sex djúpir jarðskjálftar mældust á svæði austan við Bárðarbungu á svæði þar sem djúpir jarðskjálftar eru algengir. Um 20 jarðskjálftar mældust í bergganginum undir og fyrir framan Dyngjujökul. Sjö jarðskjálftar mældust við Grímsfjall. Um 60 jarðskjálftar mældust á svæðinu norðan Vatnajökuls. Rúmlega 20 jarðskjálftar mældust við Öskju og tæplega 40 við Herðubreið og Herðubreiðartögl. Tveir jarðskjálftar mældust við Trölladyngju, einn við Tungnafellsjökul, einn við Hamarinn og einn við Brúarjökul. Þrír jarðskjálftar mældust við Langjökul, sá stærsti 1,3 að stærð.

Mýrdalsjökull

Tæplega 20 jarðskjálftar mældust í Mýrdalsjökli í vikunni, heldur færri en í síðustu viku. Flestir voru innan Kötluöskjunnar eða 14 talsins, sá stærsti 1,6 að stærð. Þrír smáskjálftar mældust við Goðabungu og einn norðvestur af Eyjafjallajökli. Á Torfajökulssvæðinu mældust 5 smáskjálftar.

Jarðvakt