	Veðurstofa Íslands Jarðeðlissvið

Jarðskjálftar 20171120 - 20171126, vika 47

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Rúmlega 280 jarðskjálftar mældust með SIL-mælakerfi Veðurstofu Íslands í vikunni, nokkru færri en í síðustu viku þegar um 330 skjálftar mældust. Stærsti skjálfti vikunnar var 3,9 að stærð norðvestur í Bárðarbungu, þann 21. nóv. kl. 13:53. Annar jarðskjálfti 3,8 að stærð nokkrum mínútum síðar kl. 13:55 á sama svæði, nokkuð færri skjálftar mældust í Bárðarbungu í vikunni samanborið við síðustu viku. Tæplega 50 skjálftar mældust í Öræfajökli, sem eru nokkuð fleiri en í síðustu viku þegar um 35 jarðskjálftar mældust þar. Stærsti skjálfti þar mældist 1,9 að stærð þann 26. nóv. kl. 12:23. Álika margir jarðskjálftar mældust undir Mýrdalsjökli í vikunni og þeirri síðustu.

Suðurland

Tæplega 40 jarðskjálftar mældust á Suðurlandi í vikunni, sem eru örlítið fleiri en vikuna á undan, þegar um 35 jarðskjálftar mældust. Allir skjálftarnir voru undir 1,6 að stærð. Tæplega 20 jarðskjálftar mældust á Hengilssvæðinu, sá stærsti 1,6 að stærð, þann 22. nóv. kl. 22:54.

Reykjanesskagi

Tuttugu og fimm jarðskjálftar mældust á Reykjanesskaga, heldur færri en vikuna á undan, þegar rúmlega 30 skjálftar mældust. Flestir við Kleifarvatn, sá stærsti mældist 1,4 að stærð þann 21. nóv. kl. 12:23,. Tveir skjálftar mældust úti á Reykjaneshrygg, sá stærri var 2,4 að stærð þann 26. nóvember kl. 12:43:07.

Norðurland

Rúmlega 25 jarðskjálftar mældust úti fyrir Norðurlandi í vikunni, sem eru færri en vikuna á undan, þegar rúmlega 40 skjálftar mældust. Rúmlega 10 jarðskjálftar mældust við Grímsey og á svæðinu rétt austur af, sá stærsti 1,5 að stærð, þann 22. nóv. kl. 03:11. Um 14 smáskjálftar mældust í Öxarfirði. Tveir skjálftar mældust við Kröflu og Þeistareyki, sá stærri var 1,8 að stærð þann 21. nóvember kl. 14:07.

Hálendið

Tæplega 90 jarðskjálftar mældust undir Vatnajökli öllum í vikunni, sem eru nokkuð færri en í síðustu viku, þegar 110 skjálftar mældust. Rúmlega 40 skjálftar mældust í Öræfajökli, sem eru nokkuð svipaður fjöldi og í síðustu viku þegar um 35 jarðskjálftar mældust þar. Stærsti skjálfti þar mældist 1,9 að stærð þann 26. nóv. kl. 12:23. Í Bárðarbungu mældust rúmlega 20 skjálftar í vikunni, sá stærsti 3,9 að stærð þann 21. nóv. kl. 13:53, annar skjálfti að stærð 3,8 fylgdi í kjölfarið kl. 13:55. Tæplega 10 jarðskjálftar mældust í bergganginum undir og fyrir framan Dyngjujökul, allir undir einu stigi. Fjórir smáskjálftar mældust við Þórðarhyrnu, tveir þeirra voru 1,9 að stærð þann 24. nóvember kl. 13:07 og 17:11. Einnig mældust nokkrir smáskjálftar á við og dreif í Vatnajökli. Um 60 jarðskjálftar mældust á svæðinu norðan Vatnajökuls. Rúmlega 5 smáskjálftar mældust við Öskju og rúmlega 20 við Herðubreið og Herðubreiðartögl, allir undir 1,5 að stærð. Fjórir jarðskjálftar mældust við Langjökul, sá stærsti 1,7 að stærð, við Hvítárvatn, þann 21. nóv kl. 10:42.

Mýrdalsjökull

Tíu jarðskjálftar mældust í Mýrdalsjökli í vikunni, helmingi færri en í síðustu viku. Þeir voru flestir innan Kötluöskjunnar, sá stærsti 1,1 að stærð, þann 24. nóv. kl. 02:28. Einn smáskjálfti mældist í Eyjafjallajökli. Á Torfajökulssvæðinu mældust rúmlega 10 jarðskjálftar, stærsti 1,5 að stærð, þann 25. nóv. kl. 00:31.

Jarðvakt