	Veðurstofa Íslands Jarðeðlissvið

Jarðskjálftar 20180115 - 20180121, vika 03

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Um 300 jarðskjálftar voru staðsettir með SIL-mælakerfi Veðurstofunnar í 3. viku 2018, heldur fleiri en í 2. viku þegar um 220 skjálftar mældust. Stærstu skjálftar vikunnar voru báðir 3,5 að stærð, sá fyrri þann 15. janúar í Bárðarbungu 21. janúar og sá síðari þann 21. norðaustan við Grindavík, sem fannst vel í bænum og bárust 12 tilkynningar þess efnis í gegnum skráningarvef Veðurstofunnar. Aðfaranótt 18. janúar kl. 2:14, mældist skjálfti 3,1 að stærð í Norðausturrima Öræfajökuls en alls mældust um 25 smáskjálftar í jöklinum í vikunni.

Suðurland

Rúmlega 60 skjálftar mældust á Suðurlandi í liðinni viku og voru þeir allir undir 2,0 að stærð. Um 20 skjálftar mældist á Hengilssvæðinu en aðrir skjálftar dreifðust um Suðurlandið. Einn smá skjálfti mældist rétt sunnan við Heklu í vikunni, hann var af stærð 0,4.

Reykjanesskagi

Rúmlega 20 skjálftar mældust á Reykjanesskaga í vikunni. Stærsti skjálftinn mældist sunnudaginn 21. rétt norðaustan við Grindavík, 3,5 að stærð, kl. 21:15. Skjálftans varð vel vart í Grindavík og barst rúmur tugur tilkynninga frá íbúum í gegnum skráningarvef Veðurstofunnar. Um 10 skjálftar mældust við Grindavík á sunnudagskvöldið, tveir aðrir yfir tveimur að stærð, sá stærri af stærð 2,8. Nokkrir skjálftar mældust við Kleifarvatn stærsti 2,2 að stærð þann 15. jan. Einn skjálfti 1,2 að stærð mældist í Bláfjöllum og annar aðeins norðar við Sandfell 1,5 að stærð. Að auki mældust tveir skjálftar úti á Reykjaneshrygg um 75km VSV af landi þann 15. jan, sá fyrri um kl. 13:40 af stærð 2,7 og sá seinni kl. 18:20, 2,5 að stærð.

Norðurland

Fremur fáir skjálftar mældust á Norðurlandi í vikunni, þrír smáskjálftar mældust við Þeistareyki í vikunni og aðrir fjórir í Kröflu stærsti 1,0 að stærð. Úti fyrir landi mældust rúmlega 20 skjálftar, 7 á Skjálfanda, um 10 í Öxarfirði og 3 á Eyjafjarðarálnum. Einn skjálfti mældist suðaustan við Grímsey og um fimm um 10 km austan við Grímsey. Þrír skjálftar á Kolbeinseyjarhrygg, sá stærsti 2,8 að stærð þann 19. janúar.

Hálendið

Rúmlega 150 skjálftar mældust í Vatnajökli og á hálendinu. Stærstu skjálftarnir mældust í Bárðarbungu og Öræfajökli. Við Öræfajökul mældust alls um 25 smáskjálftar í vikunni, stærsti skjálftinn mældist aðfaranótt 18. janúar kl. 2:14, grunnur, af stærð 3,1 í norðausturrima Öræfajökuls. Þetta er annar skjálftinn yfir þremur að stærð frá því að skjálftavirkni jókst þar og viðbúnaður var aukinn. Í Bárðarbungu mældust 2 skjálftar yfir þremur að stærð þann 15. janúar, sá stærri mældist af stærð 3,5 um kl. 9:40 og sá seinni 3,3 að stærð um 8 mínútum síðar, báðir voru við suðurenda öskjurnar. Um 25 smáskjálftar mældust í bergganginum undir Dyngjujökli þar af voru nokkrir djúpir ASA af Bárðarbunguöskjunni. Um tíu skjálftar mældust í og við Grímsfjall og þrír við Þórðarhyrnu. Þá varð skjálfti 2,2 að stærð í Kverkfjöllum. Um tugur smáskjálfta mældust við Öskju og rúmur tugur var nokkuð dreifður við Herðubreiðartögl. Einn skjálfti varð í Trölladyngju, og rúmur tugur smáskjálfta við Tungnafellsjökul.

Mýrdalsjökull

Átta skjálftar mældust í Mýrdalsjökli í vikunni allir nema einn voru innan Kötluöskjunnar, sá stærsti 1,5 að stærð, 16. janúar 2018. Fimm skjálftar mældust á Torfajökulssvæðinu, sá stærsti 1,8 að stærð þann 18. janúar.

Náttúruvársérfræðingar á vakt