	Veðurstofa Íslands Jarðeðlissvið

Jarðskjálftar 20180122 - 20180128, vika 04

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Tæplega 400 jarðskjálftar mældust með SIL-mælakerfi Veðurstofu Íslands í vikunni, heldur fleiri en vikuna á undan. Mesta virknin var á Norðurlandi í svokölluðu Grímseyjarbelti. Jarðskjálftahrina hófst norðaustur af Grímsey kl. 07:49 þann 28. janúar með skjálfta af stærð 4,1 sem fannst í Grímsey, Svarfaðardal, Þingeyjarsveit og á Akureyri. Þetta var jafnframt stærsti skjálfti vikunnar. Heldur minni virkni var undir Vatnajökli í þessari viku en þeirri fyrri. Svipuð virkni var undir Mýrdalsjökli og vikuna á undan.

Suðurland

Um tugur smáskjálfta mældist á Hengilssvæðinu og annað eins í Þrengslum og Hjallahverfi. Hátt í 20 smáskjálftar urðu á þekktum sprungum á Suðurlandsundirlendi og stakur skjálfti varð 23. janúar kl. 18:09 við Heklu, 0,3 að stærð.

Reykjanesskagi

Á annan tug skjálfta mældist við Reykjanestá um helgina. Stærsti varð 27. janúar kl. 11:38, 2,2 að stærð. Tæpur tugur skjálfta (stærsti um tvö stig) var staðsettur skammt norðaustur af Grindavík en á því svæði var nokkur skjálftavirkni vikuna á undan. Nokkrir skjálftar urðu við Kleifarvatn og svæðinu þar austur af, allir undir tveimur stigum. Nokkrir skjálftar urðu norðaustur af Eldey á Reykjaneshrygg þann 26. janúar, stærsti 2,5 að stærð kl. 04:33.

Norðurland

Mun meiri virkni, um 200 skjáfltar, var úti fyrir Norðurlandi í þessari viku en þeirri fyrri. Munar þar mestu um skjálftahrinu sem hófst að morgni 28. janúar um 12 km norðnorðaustur af Grímsey með skjálfta 4,1 að stærð, klukkan 07:49. Tilkynningar bárust frá Grímsey, Akureyri, Svarfaðardal og Þingeyjarsveit um að hann hefði fundist. Eftirskjálfti 3,3 að stærð mældist kl. 08:11. Nokkrir skjálftar voru yfir tveimur stigum en aðrir mun minni. Á þessu svæði höfðu um 150 skjálftar mælst í vikulokin en hrinunni var þá ekki lokið. Tiltölulega róleg virkni var annars staðar á Norðurlandi.

Hálendið

Ríflega 60 jarðskjálftar mældust undir Vatnajökli, nokkru færri en vikuna á undan. Mesta virknin var við Bárðarbungu þar sem á þriðja tug skjálfta mældist. Stærsti skjálftinn varð 25. janúar kl. 08:02, 2,8 að stærð. Færri skjálftar mældust við Öræfajökul í þessari viku (13) en vikuna á undan þegar 25 skjálftar voru staðsettir. Allir skjálftarnir í þessari viku voru innan við eitt stig. Um tugur smáskjálfta varð í bergganginum undir Dyngjujökli.
Á svæðinu norðan Vatnajökuls mældust um 30 skjálftar. Um tugur við Öskju, stærsti 1,7 að stærð. Svipaður fjöldi skjálfta varð við Herðubreið og Herðubreiðartögl, allir litlir. Nokkrir skjálftar urðu skammt norðvestur af Lokatindi, stærsti 2,3 að stærð. Rólegt var í vestara gosbeltinu.

Mýrdalsjökull

Rólegt var í Mýrdalsjökli í vikunni, líkt og vikuna á undan, en innan við 10 skjálftar mældust þar, flestir innan Kötluöskjunnar. Litlu fleiri mældust á Torfajökulssvæðinu. Allir skjálftarnir á þessum svæðum voru innan við tvö stig.

Jarðvakt