	Veðurstofa Íslands Jarðeðlissvið

Jarðskjálftar 20180129 - 20180204, vika 05

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Um 570 jarðskjálftar mældust með SIL-mælakerfi Veðurstofu Íslands í vikunni, töluvert fleiri en vikuna á undan þegar tæplega 400 jarðskjálftar mældust. Munar þar mestu um hrinu norðnorðaustan við Grímsey sem hófst 28. janúar, en 280 skjálftar mældust þar í vikunni. Tveir skjálftar mældust yfir þremur að stærð í hrinunni, annar 3,2 að stærð 31. janúar kl 20:20 og hinn 3,1 að stærð 4. febrúar kl 05:11. Tilkynningar bárust um að fyrri skjálftinn hafi fundist á Akureyri. Nokkru meiri virkni var undir Vatnajökli í þessari viku en þeirri fyrri. 30. janúar hófst jarðskjálftahrina í Bárðarbungu með skjálfta af stærð 3,7 kl 17:48. Í kjölfarið kom annar skjálfti 3,8 að stærð kl 18:00 og kl 19:24 kom stærsti skjálftinn, 4,9 að stærð en hann er stærsti skjálftinn í Bárðarbungu frá goslokum og einnig stærsti skjálfti vikunnar. Meiri virkni var við Öræfajökul samanborið við fyrri viku og svipuð virkni var undir Mýrdalsjökli. Einn smáskjálfti mældist við Heklu.

Suðurland

Rúmlega 50 jarðskjálftar mældust á Suðurlandi í vikunni, töluvert fleiri en vikuna á undan. Rúmlega 20 skjálftar mældust á Hengilssvæðinu, sá stærsti 2,0 að stærð og tæpur tugur smáskjálfta mældist í Þrenglsum. Um tugur smáskjálfta urðu á þekktum sprungum á Suðurlandsundirlendi og stakur skjálfti varð 30. janúar kl 15:21 í Heklu, 0,8 að stærð.

Reykjanesskagi

Á annan tug skjálfta mældist á Reykjanesskaga í vikunni, sex við Kleifarvatn og fjórir við Bláfjöll. Tveir skjálftar mældust um 40 km suður af Reykjanesi, sá stærri 2,5 að stærð 29. janúar.

Norðurland

Mun meiri virkni, rúmlega 320 jarðskjálftar, var úti fyrir Norðurlandi í þessari viku en þeirri fyrri þegar um 200 skjálftar mældust. Munar þar mestu um að jarðskjálftahrinan sem hófst að morgni 28. janúar um 12 km norðnorðaustur af Grímsey hélt áfram, en tæplega 280 jarðskjálftar mældust þar í vikunni. Tveir skjálftar mældust yfir þremur að stærð í hrinunni, annar 3,2 að stærð 31. janúar kl 20:20 og hinn 3,1 að stærð 4. febrúar kl 05:11. Tilkynningar bárust um að fyrri skjálftinn hafi fundist á Akureyri. Rúmlega 20 skjálftar voru yfir tveimur að stærð, en aðir minni. Tiltölulega róleg virkni var annars staðar á Norðurlandi, en rúmlega 20 skjálftar mældust í Öxarfirði og fáeinir á Húsavíkur-Flateyjar beltinu.

Hálendið

Rúmlega 110 skjálftar mældust undir Vatnajökli í vikunni, nokkru fleiri en vikuna á undan. Mesta virknin var í Bárðarbungu þar sem tæplega 50 jarðskjálftar mældust. 30. janúar hófst jarðskjálftahrina í Bárðarbungu með skjálfta af stærð 3,7 kl 17:48. Í kjölfarið kom annar skjálfti 3,8 að stærð kl 18:00 og kl 19:24 kom stærsti skjálftinn, 4,9 að stærð en hann er stærsti skjálftinn í Bárðarbungu frá goslokum og einnig stærsti skjálfti vikunnar. 35 jarðskjálftar mældust við Öræfajökul sem er töluvert meiri fjöldi en í síðustu viku þegar 13 skjálftar mældust. Allir skjálftarnir voru innan við eitt stig. Tíu skjálftar mældust í bergganginum undir Dyngjujökli, svipaður fjöldi og í síðustu viku. Tveir djúpir skjálftar mældust auk þess þar sem berggangurinn beygir en þar eru djúpir skjálftar algengir. Um tugur skjálfta mældist við Grímsfjall, sá stærsti 2,1 að stærð 3. febrúar. Á svæðinu norðan Vatnajökuls mældust rúmlega 40 jarðskjálftar. Þar af um 20 við Öskju, sá stærsti 2,2 að stærð. Svipaður fjöldi skjálfta varð við Herðubreið og Herðubreiðartögl, allir litlir. Einn skjálfti mældist skammt norðvestur af Lokatindi, en nokkrir skjálftar mældust þar í síðustu viku. Einn skjálfti mældist við Dyngjufjöll ytri. Rólegt var í vestara gosbeltinu.

Mýrdalsjökull

Rólegt var í Mýrdalsjökli í vikunni, líkt og vikuna á undan, en fimm jarðskjálftar mældust þar í vikunni, þar af fjórir innan Kötluöskjunnar, sá stærsti 2,2 að stærð. 15 jarðskjálftar mældust á Torfajökulssvæðinu, allir innan við tvö stig. Einn smáskjálfti mældist í Eyjafjallajökli í vikunni.

Jarðvakt