	Veðurstofa Íslands Jarðeðlissvið

Jarðskjálftar 20180326 - 20180401, vika 13

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Rúmlega 460 jarðskjálftar voru staðsettir með SIL-mælakerfi Veðurstofu Íslands í vikunni, nokkuð fleiri en í vikunni áður þegar rúmlega 400 skjálftar mældust. Minni virkni var undir Vatnajökli í þessari viku en þeirri síðustu, en mun meiri á Norðurlandi. Stærsti skjálfti vikunnar var 3,8 að stærð, um 50 km N af Siglufirði, þann 31. mars kl 09:35. Þann 1. apríl kl. 13:33 varð skjálfti af stærð 3,2 í norðanverðri Bárðarbunguöskjunni. Einn smáskjálfti mældist við Heklu.

Suðurland

Tæplega 60 skjálftar mældust á Suðurlandi í liðinni viku, nokkuð færri en vikuna á undan og voru þeir allir undir 1,6 að stærð. Þar af mældust rúmlega 40 skjálftar á Hengilssvæðinu og Ölfusi, en aðrir skjálftar dreifðust um Suðurlandið. Einn smáskjálfti mældist við Heklu og tveir við Skarðsfjall.

Reykjanesskagi

Tæplega 40 jarðskjálftar mældust á Reykjanesskaga í vikunni. Sá stærsti var 2,5 að stærð við Fagradalsfjall kl. 19:11:24 í smáhrinu sem varð þar á Páskadagskvöld, þar sem tveir aðrir skjálftar mældust yfir 2,0 að stærð. Þá mældust nokkrir skjálftar úti á Reykjaneshrygg, sá stærsti var 2,0 að stærð, þann 28. mars.

Norðurland

Um 150 jarðskjálftar mældust á Norðurlandi, rúmlega tvöfalt fleiri en í liðinni viku. Stærsti skjálftinn var um 50 km N af Siglufirði kl. 09:35 þann 31. mars. Var hann 3,8 að stærð. Honum fylgdu tveir minni skjálftar um 2,0 að stærð. Þriðjudaginn 27. mars mældust tveir skjálftar stærri en 3. Sá fyrri var kl. 02:33 úti fyrir Eyjafirði og mældist hann 3,3 að stærð en sá síðari var kl. 03:00, um 10 km NA af Grímsey, og var hann 3,2 að stærð. Rúmlega 30 jarðskjálftar undir 2,0 að stærð mældust á Grímseyjarbeltinu. Tæplega 50 skjálftar mældust í Öxarfirði. Rúmlega 10 smáskjálftar mældust á Húsavíkur ¿ Flateyjar misgenginu, þeirra stærstur var kl. 22:10 þann 31. mars og var 2,2 að stærð. Fimm smáskjálftar mældust við Þeistareyki og í Mývatnssveit. Einn jarðskjálfti mældist norður á Kolbeinseyjarhrygg.

Hálendið

Rúmlega 70 jarðskjálftar mældust undir Vatnajökli í vikunni, sem eru færri en vikuna á undan með um 120 jarðsskjálftum. Um 14 jarðskjálfar mældust í Bárðarbungu, nokkuð færri en í síðustu viku. Stærsti skjálfti vikunnar var 3,2 að stærð við Bárðarbungu 1. apríl kl 13:33. Tæplega 5 djúpir smáskjálftar urðu á svæði þar sem gangurinn beygir til norðurs og rúmlega 20 smáskjálftar mældust í bergganginum undir og fyrir framan Dyngjujökul. Rúmlega 10 smáskjálftar mældust nokkuð vestan við ganginn 31. mars og 1. apríl. Allir undir 1,0 að stærð. Tæplega 10 smáskjálftar voru við Grímsfjall og einn á Lokahrygg. Tæplega 10 smáskjálftar mældust í Öræfajökli, töluvert færri en vikuna á undan þegar þeir voru um 60. Sá stærsti þar var 0,9 að stærð 26. mars kl. 14:42. Rúmlega 70 jarðskjálftar mældust á svæðinu norðan Vatnajökuls, nokkuð færri en vikuna á undan. Þar af um 8 smáskjálftar við Öskju og 64 við Herðubreið og Herðubreiðartögl. Tveir jarðskjálftar mældust við NA-verðan Langjökul, sá stærri var 1,9 að stærð þann 26. mars kl. 00:24.

Mýrdalsjökull

Fimmtán jarðskjálftar mældust í Mýrdalsjökli í vikunni, nokkru færri en vikuna á undan. Flestir skjálftanna, urðu innan Kötluöskjunnar. Sá stærsti 2,7 að stærð, þann 1. apríl kl. 22:17. Tveir aðrir um 2,0 að stærð mældust á sama svæði að kvöldi Páskadags. Nokkur virkni var á Torfajökulsvæðinu, einkum í smáhrinu þann 27. mars, en alls mældust um 15 skjálftar á því svæði í vikunni, þeirra stærstur var 1,8 að stærð kl. 15:48 þann 27. mars.

Jarðvakt