	Veðurstofa Íslands Jarðeðlissvið

Jarðskjálftar 20180402 - 20180408, vika 14

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Um 450 jarðskjálftar voru staðsettir með SIL-mælakerfi Veðurstofunnar í liðinni viku, svipaður fjöldi og í vikunni áður. Stærsti skjálfti vikunnar var 3,3 að stærð og mældist austan við Grímsey þann 5. apríl. Nokkrum mínútum áður hafði skjálfti af stærð 3,0 mælst á sama stað. Um 85 skjálftar mældust undir Öræfajökli í liðinni viku og er það talsverð aukning frá vikunni áður þegar um 10 skjálftar mældust. Einn smáskjálfti mældist í Heklu.

Suðurland

Um 65 skjálftar mældust á Suðurlandi í liðinni viku og voru þeir allir undir 2,0 að stærð. Rúmlega tveir tugir skjálfta mældist á Hengilssvæðinu og nokkrir í Hjallahverfi. Tveir skjálftar mældust norðan við Þingvallavatn. Annars var virknin nokkuð dreifð um Suðurlandið. Einn skjálfti mældist í Heklu í vikunni, af stærð 0,2.

Reykjanesskagi

Rúmlega 30 skjálftar mældust á Reykjanesskaga í vikunni. Tveir stærstu skjálftarnir mældust 2,3 að stærð, aðrir voru undir 2,0. Mesta virknin bundin við Langahrygg. Einnig mældust nokkrir skjálftar úti á Reykjaneshrygg og í Brennisteinsfjöllum.

Norðurland

Tæplega 100 skjálftar mældust á Norðurlandi í liðinni viku. Stærsti skjálftinn var 3,3 að stærð og mældist hann austan við Grímsey kl. 18:14 þann 5. apríl. Þetta var jafnframt stærsti skjálfti vikunnar. Nokkrum mínútum áður hafði mælst skjálfti af stærð 3,0 á sama stað. Engin tilkynning barst um að skjálftarnir hafi fundist í eynni. Mesta skjálftavirknin á Norðurlandi var á Grímseyjarbeltinu. Einn skjálfti mældist við Þeistareyki og nokkrir í Kröflu. Einnig mældust nokkrir skjálftar norður á Kolbeinseyjarhrygg.

Hálendið

Um 160 skjálftar mældust undir Vatnajökli í vikunni. Tæplega 20 skjálftar mældust í Bárðarbunguöskjunni, allir undir 2,0 að stærð. Um 35 skjálftar mældust í bergganginum undir Dyngjujökli. Um 85 skjálftar mældust í Öræfajökli, talsvert fleiri en í síðustu viku þegar aðeins um 10 skjálftar mældust. Allir voru þeir undir 2,0 að stærð. Nokkrir skjálftar mældust í Grímsvötnum og tæplega tugur á Lokahrygg austur af Hamrinum. Fjórir skjálftar mældust í nágrenni Kverkfjalla.

Norðan Vatnajökuls mældust rúmlega 50 skjálftar, allir undir 1,0 að stærð. Flestir voru þeir í nágrenni Herðubreiðar og Herðubreiðartagla.

Tæplega 30 skjálftar mældust á Torfajökulssvæðinu.

Mýrdalsjökull

Rúmlega 10 skjálftar mældust í Mýrdalsjökli í liðinni viku, allir undir 1,9 að stærð. Flestir voru þeir innan Kötluöskjunnar.

Jarðvakt