	Veðurstofa Íslands Jarðeðlissvið

Jarðskjálftar 20180409 - 20180415, vika 15

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Um 500 jarðskjálftar voru staðsettir með SIL-mælakerfi Veðurstofunnar í liðinni viku, ívið fleiri en í vikunni á undan. Stærsti skjálfti vikunnar mældist 3,3 að stærð langt norður á Kolbeinseyjarhrygg þann 14. apríl 2018. Flestir skjálftanna mældust á hálendinu, þar af rúmlega 50 skjálftar í Öræfajökli, 30 skjálftar við Bárðarbungu og um 110 við Herðubreið í hrinu sem hófst 14. apríl. Fremur lítil virkni var á Suðurlandsbrotabeltinu, en áfram talsverð virkni fyrir norðan land, við Grímsey, Flatey og í Öxarfirði. Einn skjálfti mældist í Langjökli.

Suðurland

Rúmlega 40 skjálftar mældust á Suðurlandi í liðinni viku og voru þeir allir undir 2,0 að stærð. Tæplega 30 þeirra mældust á Hengilssvæðinu og nokkrir við Þorlákshafnarveg. Annars var fremur lítil virkni á Suðurlandsbrotabeltinu. Enginn skjálfti mældist við Heklu í vikunni.

Reykjanesskagi

Tæplega 20 skjálftar mældust á Reykjanesskaga í vikunni. Tveir stærstu skjálftarnir mældust 1,8 að stærð, annar í Kleifarvatni og hinn við Fagradalsfjall, en mesta virknin var bundin við þessi svæði. Einnig mældust þrír skjálftar úti á Reykjaneshrygg um og undir tveimur að stærð.

Norðurland

Fimm skjálftar mældust á Norðurlandi í vikunni og rúmlega 110 úti fyrir landi. Stærstu skjálftarnir mældust á Kolbeinseyjarhrygg, en þar mældist stærsti skjálfti vikunnar 3,3 að stærð þann 14. apríl. Norðaustan við Grímsey voru staðsettir 45 skjálftar, sá stærsti um 2,1 að stærð þann 15 apríl. Um 20 skjálftar mældust í Öxarfirði allir undir tveimur að stærð. Sex skjálftar mældust í hnapp úti á Eyjafjarðarál, sá stærsti 2,8 að stærð, þann 12. apríl. Í og við Flatey mældust 15 skjálftar, sá stærsti um 1,6 að stærð.

Hálendið

Um 290 skjálftar mældust á hálendinu í vikuinni. Rúmlega 50 skjálftar mældust í Öræfajökli, þar af voru fjórir yfir 1,2 að stærð. Stærsti skjálftinn þar mældist 1,5 að stærð þann 9. apríl og var hann í austurbrún öskjunnar. Tæplega 30 skjálftar mældust við Bárðarbunguöskjuna, stærsti skjálftinn var 2,6 að stærð þann 14. apríl við norðurrima öskjunnar og annar degi síðar 2,2 að stærð við austurrimann. Um 25 skjálftar mældust við berganginn, sem liggur undir Dyngjujökli. Fimm skjálftar mældust við Grímsvötn og aðrir 5 austan við Köldukvíslarjökul.

Norðan Vatnajökuls mældust rúmlega 160 skjálftar, um 110 þeirra voru við Herðubreið og Herðubreiðartögl flestir norðvestan við Herðubreið. Þar mældist skjálfti af stærð 2,4 þann 14. apríl og fylgdu margir skjálftar þar á eftir í lítilli hrinu. Um 30 skjálftar mældust við Öskju flestir rétt austan við Öskjuvatn allir undir 2,0 að stærð.

Einn skjálfti 1,9 að stærð mældist í Langjökli og tveir aðrir sunnan við jökulinn rétt austan við Sandvatn, annar 2,0 að stærð og hinn 1,3.

Mýrdalsjökull

Um 15 skjálftar mældust í Mýrdalsjökli í liðinni viku, stærstu skjálftar vikunnar þar mældust þann 9. apríl, sá fyrri 2,0 að stærð og seinni 1,9 að stærð. Aðrir skjálftar voru undir 1,5 að stærð og voru flestir innan Kötluöskjunnar. Rúmlega 20 skjálftar mældust á Torfajökulsvæðinu allir undir 1,0 að stærð.

Náttúruvársérfræðingur á vakt