	Veðurstofa Íslands Jarðeðlissvið

Jarðskjálftar 20180416 - 20180422, vika 16

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Um 360 jarðskjálftar voru staðsettir með SIL-mælakerfi Veðurstofunnar í vikunni, talsvert færri en vikuna á undan. Heldur minni virkni var undir Öræfajökli í þessari viku en þeirri fyrri en litlu fleiri undir Bárðarbungu. Engar hrinur urðu í vikunni. Stærsti skjálfti við landið var 2,4. Skjálftar af þeirri stærð urðu við Grímsey, við Trölladyngju og á Torfajökulssvæðinu.

Suðurland

Á Hengilssvæðinu mældust 10 skjálftar, allir innan við tvö stig. Nokkrir smáskjálftar voru staðsettir í Þrengslum og Hjallahverfi. Tveir skjálftar urðu vestan við Heklu. Sá stærri varð 17. apríl kl. 10:47, 1,1 að stærð, hinn var innan við eitt stig. Rólegt var á Suðurlandsbrotabeltinu.

Reykjanesskagi

Um tugur skjálfta mældist skammt vestan við Trölladyngju að morgni 22. apríl. Stærsti skjálftinn varð 22. apríl kl. 10:28, 2,4 að stærð. Annar eins fjöldi smáskjálfta mældist austar og vestar á skaganum.

Norðurland

Um 70 jarðskjálftar urðu úti fyrir Norðurlandi í vikunni, heldur færri en í liðinni viku. Mesta virknin var, líkt og oft áður, í Grímseyjarbeltinu þar sem mældust tæplega 40 skjálftar. Tveir skjálftar voru staðsettir undir eða rétt vestan við Grímsey, báðir þann 17. apríl. Stærri skjálftinn var 2,4 að stærð og var það stærsti skjálftinn við Norðurland í vikunni. Hátt í 20 jarðskjálftar urðu við Flatey, flestir um og innan við eitt stig.
Nokkrir smáskjálftar mældust á svæðunum við Kröflu og Þeistareyki. Nokkrir skjálftar urðu norður á Kolbeinseyjarhrygg þann 22. apríl, stærsti skjálftinn þar var 3,1 að stærð.

Hálendið

Rúmlega 100 skjálftar mældust undir Vatnajökli í vikunni. Tæplega 50 urðu í Bárðarbungu, heldur fleiri en vikuna á undan. Stærsti skjálftinn varð 20. apríl kl. 22:01, 2,2 að stærð en flestir aðrir voru undir einu stigi. Liðlega 30 smáskjálftar voru staðsettir í bergganginum undir og framan við Dyngjujökul og nokkrir á Lokahrygg. Heldur minni virkni var undir Öræfajökli í þessari viku en þeirri fyrri, tæplega 20 miðað við 50 í síðustu viku. Allir skjálftarnir voru um og undir einu stigi að stærð.
Mun rólegra var á svæðinu norðan Vatnajökuls þessa vikuna en þá fyrri. Um 80 skjálftar voru staðsettir þar í þessari viku en 160 í síðustu viku. Hátt í 20 smáskjálftar urðu við Öskju, aðrir við Herðubreið og Herðubreiðartögl, þar sem stærsti skjálftinn var 1,5 þann 21. apríl.
Tveir skjálftar urðu undir Geitlandsjökli, í Langjökli, sá stærri 1,5 að stærð en hinn 1,2. Nokkrir skjálftar mældust norðan og austan við Sandvatn, allir undir tveimur stigum.

Mýrdalsjökull

Frekar rólegt var í Mýrdalsjökli í vikunni, líkt og nokkrar undanfarnar vikur. Um 10 skjálftar voru staðsettir, flestallir í austanverðri Kötluöskjunni. Stærsti skjálftinn varð 16. apríl kl. 01:55, 1,4 að stærð. Álíka fjöldi mældist á Torfajökulssvæðinu. Stærsti skjálftinn þar varð 20. apríl kl. 07:47, 2,4 að stærð.

Jarðvakt