	Veðurstofa Íslands Jarðeðlissvið

Jarðskjálftar 20180716 - 20180722, vika 29

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Um 320 jarðskjálftar voru staðsettir með SIL-mælakerfi Veðurstofu Íslands í vikunni , örlítið fleiri en í vikunni á undan. Þar af voru 6 skjálftar yfir 2 að stærð og rúmlega 50 á stærðarbilinu 1 til 2. Stærsti skjálfti vikunnar var 3,4 að stærð þann 20. júlí kl. 06:28 með upptök í suðaustanverðri Bárðarbungaöskjunni. Einn smáskjálfti mældist við Heklu.

Suðurland

Tæplega 20 smáskjálftar voru á Hengilssvæðinu, sá stærsti 1,1 að stærð. Um 30 skjálftar voru á Suðurlandsbrotabeltinu. Stærsti skjálftinn var suðvestan við Ingólfsfjall þann 21.7. kl. 02:49 með stærðina 1,8. Einn smáskjálfti 0,5 að stærð var í Heklu þann 16.7.

Reykjanesskagi

Um 25 skjálftar áttu upptök á Reykjanesskaga. Upptök flestra skjálftanna voru við Reykjanestá og á Krýsuvíkursvæðinu. Stærsti skjálftinn var af stærð 1,5 þann 17.7. með upptök við Reykjanestána. Um 20 skjálftar mældust norðaustur af Eldey á Reykjaneshrygg og sá stærsti var 2,4 að stærð þann 17.7.

Norðurland

Úti fyrir Norðurlandi á svonefndu Tjörnesbrotabelti mældust rúmlega 50 skjálftar. Upptök skjálftanna voru í Eyjafjarðarál, á Húsavíkur-Flateyjarmisgenginu og á Grímseyjarbeltinu. Stærsti skjálftinn var í Eyjafjarðarál þann 18.7. kl. 02:51 og mældist 2,7 að stærð. Fáeinir smáskjálftar voru við Kröflu og Þeistareyki.

Hálendið

Rúmlega 100 jarðskjálftar mældust undir Vatnajökli í vikunni, fleiri en í fyrri viku þegar um 40 jarðsskjálftar mældust. Tæplega 30 jarðskjálftar mældust í Bárðarbungu, nokkur fleiri in í síðustu viku, þar sem 10 jarðskjálftar mældust. Stærsti skjálfti vikunnar var 3,4 að stærð 20. júlí kl. 06:28 í suðaustanverðri Bárðarbungaöskjunni. Um 20 smáskjálftar urðu á svæði þar sem gangurinn beygir til norðurs og fjórir smáskjálftar mældust í bergganginum undir og fyrir framan Dyngjujökul. Tæplega 40 smáskjálftar mældust í Öræfajökli, mun fleiri en vikuna á undan þegar þeir voru 15. Sá stærsti 1,3 að stærð þann 20.7.

Um 50 jarðskjálftar mældust á svæðinu norðan Vatnajökuls en vikuna á undan voru þeir 60. Þar af voru um 15 skjálftar við Öskju og 30 jarðskjálftar við Herðubreið og Herðubreiðartögl. Sá stærsti 2,1 að stærð við Öskju þann 21. júlí.

Þrír skjálftar voru undir undir norðaustanverðum Hofsjökli þann 17. júlí og einn skjálfti af stærð 1,9 var rétt sunnan við Blöndulón þann 16.7. kl. 19:14.

Mýrdalsjökull

Tæplega 15 jarðskjálftar mældust í Mýrdalsjökli í vikunni, færri en í fyrri viku þegar rúmlega 20 skjálftar mældust. Sá stærsti 2,1 að stærð þann 19 júlí. Flestir skjálftanna, urðu innan Kötluöskjunnar. Átta smáskjálftar mældust á Torfajökulsvæðinu.

Jarðvakt