	Veðurstofa Íslands Jarðeðlissvið

Jarðskjálftar 20180806 - 20180812, vika 32

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Í vikunni voru staðsettir 560 skjálftar með SIL-kerfi Veðurstofu Íslands, eða um 70 fleiri en vikuna á undan. Þrír skjálftar mældust yfir 3 að stærð í vikunni, M3,1 í norðanverðri Kötluöskju kl. 21:39 þann 8. ágúst og tveir skjálftar mældust um 150 km fyrir norðan land á Kolbeinseyjarhrygg þann 11. ágúst, 3,1 og 3,5 að stærð. Í vikunni mældist hrina austan við Bláfjöll og skjálfavirkni í Mýrdalsjökli og Öræfajökli var áberandi.

Suðurland

Tæplega 10 smáskjálftar mældust á Hengilssvæðinu. Á Suðurlandsbrotabeltinu mældust tæplega 30 skjálftar sá stærsti tæplega 2 þann 7. ágúst í Holtunum.

Eyjafjallajökull og Hekla

Enginn skjálfti mældist í Eyjafjallajökli í vikunni. Enginn skjálfti mældist í Heklu í vikunni.

Reykjanesskagi og Reykjaneshryggur

Á Reykjanesskaga mældist 215 skjálftar. Flestir þeirra, eða tæplega 200 skjálftar, mældust austan við Bláfjöll (utan í Lambafellshálsi) í hrinu sem hófst þann 11. ágúst með skjálfta að stærð 2,6 (kl. 14:07) og var að mestu lokið þann 12. ágúst. Á Reykjanesi mældust 5 skjálftar, sá stærsti mældist 2,5 þann 12. ágúst. Um 10 skjálftar mældust við Kleifarvatn. Engir skjálftar mældust útá Reykjaneshrygg.

Norðurland

Alls mældust tæplega 40 skjálftar á Tjörnesbrotabeltinu, talsvert færri en í sl. viku. Mest var virknin á Grímseyjarmisgenginu Tveir skjálftar mældust um 10 km norður af Mývatni. Á Grímseyjarmisgenginu urðu alls um 25 skjálftar og 10 á Húsavíkur-Flateyjarmisgenginu. Einn skjálfti mældist um 3 km austur af Dalvík. Á Kolbeinseyjarhrygg, um 150 km norður af landi, mældust 6 skjálftar að stærð frá 2,5 uppí 3,5.

Vatnajökull

Í Vatnajökli mældust um 100 skjálftar, heldur færri en í síðustu viku. Flestir skjálftar mældust í Öræfajökli (tæplega 70 skjálftar), við Bárðarbungu (14 skjálftar) og Grímsvötn (10 skjálftar). Flestir skjálftar í Öræfajökli mældust á öskjurima og nærri Hvannadalshnjúk. Flestir skjálftarnir voru frekar smáir, sá stærsti var 1.7 að stærð. 3 skjálftar mældust við Skaftárkatla.

Hálendið

Við Öskju mældust um 10 skjálftar. Við Herðubreið og Herðubreiðatögl mældust um 60 skjálftar, en stærsti skjálftinn var um 1,5 að stærð. Einn skjálfti mældist nyrst í Dyngjufjöllum ytri (1,5 að stærð) og 2 skjálftar rúmlega 1 að stærð mældust við Eggert (sunnan við Herðubreiðarfjöll).

Mýrdalsjökull og Torfajökull

73 skjálftar mældust í Mýrdalsjökli, svipað og í síðustu viku, þar af var stærstur skjálfti af stærð 3.1 kl. 21:39 þann 8. ágúst. Flestir skjálftarnir mældust 9. ágúst. Um 6 skjálftar mældust í Torfajökulsöskjunni. 11

Langjökull og vestra gosbeltið

Einn skjálfti mældist í Geitlandsjökli, 1,4 að stærð. Tveir skjálftar mældust um 8 km austur af Eystri-Hagafellsjökli, báðir ríflega 1 að stærð. Einn skjálfti um 1 að stærð mældist rétt suður af Skjaldbreiði.

Náttúruvársérfræðingur