	Veðurstofa Íslands Jarðeðlissvið

Jarðskjálftar 20180813 - 20180819, vika 33

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Í vikunni voru staðsettir um 340 skjálftar með SIL-kerfi Veðurstofu Íslands, talsvert færri en vikuna á undan. Stærsti skjálfti vikunnar mældist 3,8 að stærð um 1,5 km vestan við Hrafntinnusker þann 16. ágúst kl. 16:24 annar af stærð 3,3 mældist þar skömmu síðar kl. 16:27. Tveir aðrir skjálftar mældust yfir 3,0 að stærð í vikunni, annar í Bárðarbungu 3,5 að stærð þann 16. ágúst kl 15:05, og hinn 3,2 að stærð langt úti á Kolbeinseyjarhrygg, 13. ágúst kl. 07:51.

Reykjanesskagi og Reykjaneshryggur

Á Reykjanesskaga mældust rúmlega 40 skjálftar, talsvert færri en vikuna á undan. Á Lambafellshálsi þar sem var jarðskjálftahrina vikuna á undan mældust 4 skjálftar undir 1,0 að stærð. Flestir skjálftar vikunnar mældust við Vigdísarvelli, þar af einn af stærð 1,9. Við Reykjanestá mældust 5 skjálftar sá stærsti mældist einnig 1,9 að stærð. Fimm skjálftar mældust úti á Reykjaneshrygg stærsti skjálftinn mældist 2,5 að stærð þann 15. ágúst um 90 km VSV af Reykjanestá.

Suðurland

Rúmlega 30 skjálftar mældust í hrinu við Raufarhólshelli, stærsti skjálftinn mældist 2,5 að stærð en aðrir voru undir 2,0 að stærð. 6 skjálftar mældust á Hengilssvæðinu. Skammt sunnan við Hestfjall í Flóahreppi var um tugur skjálfta staðsettur, stærsti 2,0 að stærð þann 15. ágúst. Annar skjálfti yfir 2,0 að stærð Suðurlandi mældist 2,4 að stærð um 3 km SSV af Skarðsfjalli.

Hekla

Enginn skjálfti mældist í Heklu en einn rétt sunnan við hana -0,01 að stærð.

Mýrdalsjökull og Torfajökull

10 skjálftar mældust í Mýrdalsjökli, talsvert færri en í síðustu viku, þrír skjálftar mældust 1,6 að stærð tveir við Goðalandsjökul þann 15. ágúst og einn við norðanverða Kötluöskjuna þann 19. ágúst. Rúmlega 20 skjálftar mældust á Torfajökulssvæðinu og flestir þann 16. ágúst, þann dag kl. 16:24 mældist skjálfti af stærð 3,8 og annar skömmu síðar kl. 16:27 af stærð 3,3 í vestanverðri Torfajökulsöskjunni. Skjálftinn fannst vel í Landmannalaugum og voru upptök hanns skammt frá Hrafntinnuskerjum, en engar tilkynningar bárust þaðan. Þessi skjálfti er sá stærsti sem mælst hefur í Torfajökulsöskjunni, en um 15 skjálftar yfir 3 að stærð hafa mælst þar síðan mælingar hófust.

Eyjafjallajökull

Enginn skjálfti mældist í Eyjafjallajökli í vikunni.

Hálendið

Við Öskju mældust rétt tæplega 40 skjálftar þar af tveir 1,9 að stærð. Við Herðubreið og Herðubreiðartögl mældust um 10 skjálftar. Enginn skjálfti mældist á vestra gosbeltinu við Langjökul í vikunni.

Vatnajökull

Í Vatnajökli mældust um 80 skjálftar, heldur færri en í síðustu viku. Rúmur helmingur þeirra mældust í Öræfajökli (rúmlega 40 skjálftar), við Bárðarbungu mældust 5 skjálftar, við Grímsvötn 6 skjálftar og á Lokahrygg 5 skjálftar. Rúmur tugur skjálfta mældist í bergganginum undir Dyngjujökli og 7 skjálftar í Skeiðarárjökli.
Flestir skjálftar í Öræfajökli mældust á öskjurima, þar af voru 6 skjálftar stærri en 1,0. Stærsti skjálftinn 2,2 að stærð mældist við suðaustanverðan rimann, en annar skjálfti 2,0 að stærð við norðvestanverðan rimann nærri Hvannadalshnjúki. Í Bárðarbungu mældist skjálfti af stærð 3,5 þann 16. ágúst kl 15:05.

Norðurland

Við Kröflu mældust tveir skjálftar, sá stærri var af stærð 1,3. Við Þeistareyki mældust þrír skjálftar undir 1,0 að stærð. Alls mældust tæplega 60 skjálftar á Tjörnesbrotabeltinu, svipaður fjöldi og í vikunni á undan. Mest var virknin á Grímseyjarbeltinu þar af einn skjálfti 1,9 að stærð, 18. ágúst. Langt úti á Kolbeinseyjarhrygg mældust 2 skjálftar þann 13. ágúst, sá stærri var 3,2 og hinn 2,5 að stærð.

Náttúruvársérfræðingur á jarðvakt