	Veðurstofa Íslands Jarðeðlissvið

Jarðskjálftar 20180827 - 20180902, vika 35

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Tæplega 280 jarðskjálftar mældust með SIL-mælakerfi Veðurstofu Íslands í vikunni, heldur færri en vikuna á undan. Stærsti skjálfti vikunnar var 4,3 að stærð 360 km NNA af Kolbeinsey. Næst stærsti skjálftinn var 2,8 að stærð suður af Hestvatni á Suðurlandi. Nokkur virkni var í Öræfajökli, en hún var minni en vikuna á undan. Svipuð virkni var í Bárðarbungu og Kötlu og í síðustu viku en enginn skjálfti mældist við Heklu. Ein tilkynning barst um skjálfta sem fannst í byggð, en það var smáskjálfti rétt norðan við Hveragerði 31. ágúst.

Suðurland

Tæplega 60 jarðskjálftar mældust á Suðurlandi í vikunni, töluvert fleiri en vikuna á undan. Stærsti skjálftinn var 2,8 að stærð 28. ágúst suður af Hestvatni. 13 skjálftar mældust á Hengilssvæðinu. Fimm skjálftar mældust í Vatnafjöllum en enginn skjálfti mældist við Heklu í vikunni. Aðrir skjálftar mældust á víð og dreif um Suðurlandsbrotabeltið. Smáskjálfti (M0,9) mældist rétt norðan við Hveragerði 31. ágúst sem fannst þar.

Reykjanesskagi

Níu smáskjálftar mældust á Reykjanesskaga, þar af tveir við Kleifarvatn. Sjö skjálftar mældust á Reykjaneshrygg, allir undir tveimur að stærð.

Norðurland

Rúmlega 40 jarðskjálftar mældust á Norðurlandi, mun færri en vikuna á undan. Stærsti skjálftinn var 1,6 að stærð 27. ágúst við Kröflu, en alls mældust sjö skjálftar þar. Sex smáskjálftar mældust við Þeistareyki. Tæplega 20 skjálftar mældust á Grímseyjarbeltinu, þar af fimm við Grímsey og fjórir í Öxarfirði. 13 skjálftar mældust á Húsavíkur - Flateyjar misgenginu. Einn smáskjálfti mældist rúma 4 km norður af Dalvík og einn rúma 13 km norðaustur af Grenivík. Skjálfti 4,3 að stærð mældist 360 km NNA af Kolbeinsey 31. ágúst kl 15:37.

Hálendið

Tæplega 80 jarðskjálftar mældust undir Vatnajökli í vikunni, mun færri en vikuna á undan. Tæplega 50 skjálftar mældust í Öræfajökli, sá stærsti 2,1 að stærð sem er heldur minni en í vikunni á undan. Níu skjálftar mældust í Bárðarbungu, svipaður fjöldi og í síðustu viku. Stærsi skjálftinn var 2,1 að stærð. Einn smáskjálfti mældist við Grímsfjall og tveir við Hamarinn. Tveir skjálftar mældust austan við Tungnafellsjökul. Einn djúpur skjálfti mældist þar sem berggangurinn beygir til norðurs og oft mælast djúpir skjálftar, tíu smáskjálftar mældust í ganginum undir og fyrir framan Dyngjujökul. 26 smáskjálftar mældust við Öskju og 30 við Herðubreið og Herðubreiðartögl. Tveir skjálftar mældust við Langjökul.

Mýrdalsjökull

15 jarðskjálftar mældust undir Mýrdalsjökli í vikunni, fleiri en vikuna á undan, 11 þeirra voru innan Kötluöskjunnar, sá stærsti 2,3 að stærð. Fjórir smáskjálftar mældust við Goðabungu. Sjö smáskjálftar mældust í Torfajökli og einn 16km norðan við Torfajökul.

Jarðvakt