	Veðurstofa Íslands Jarðeðlissvið

Jarðskjálftar 20180903 - 20180909, vika 36

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Um 270 jarðskjálftar mældust með SIL-mælakerfi Veðurstofu Íslands í vikunni, svipað og vikuna á undan. Stærsti skjálfti vikunnar var 2,5 að stærð, þann 06. september kl. 23:16, í sunnanverðri Bárðarbunguöskjunni. Nokkur virkni var í Öræfajökli, svipaður fjöldi og í fyrri viku. Einn smáskjálfti mældist við Heklu. Ein tilkynning barst um skjálfta sem fannst í byggð, í Laugardal þann 05. september.

Suðurland

Tæplega 45 jarðskjálftar mældust á Suðurlandi í vikunni, töluvert færri en vikuna á undan. Stærsti skjálftinn var 1,6 að stærð 3. september í Vatnafjöllum. Þrettán skjálftar mældust á Hengilssvæðinu. Einn smáskjálfti mældist við Heklu í vikunni. Aðrir skjálftar mældust á víð og dreif um Suðurlandsbrotabeltið.

Reykjanesskagi

29 jarðskjálftar mældust á Reykjanesskaga, sá stærsti var 1,9 að stærð. Flestir skjálftar voru suður og suðvestur af Kleifarvatni. Sjö skjálftar mældust á Reykjaneshrygg, sá stærsti 2,4 að stærð þann 7. september kl. 05:54.

Norðurland

Rúmlega 40 jarðskjálftar mældust á Norðurlandi, svipaður fjöldi og í fyrri viku. Stærsti skjálftinn var 2,3 að stærð, þann 06. september, austur af Grímsey. Tæplega 25 skjálftar mældust í Grímseyjarbeltinu, þar af 15 við Grímsey og 10 í Öxarfirði. Tíu smáskjálftar mældust á Húsavíkur- Flateyjarmisgenginu.
Um 30 skjálftar mældust norður á Kolbeinseyjarhrygg í skjálftahrinu sem varð þar þann 8. september. Stærsti skjálftinn varð klukkan 13:30, þann dag, og var hann 3,3 að stærð. Um tugur skjálfta var um og yfir þremur stigum. Tveir smáskjálftar mældust við Þeistareyki og þrír við Kröflu, sá stærsti 2,0 að stærð, þann 9. september.

Hálendið

Rúmlega 90 jarðskjálftar mældust undir Vatnajökli í vikunni, nokkru fleiri en vikuna á undan. Tæplega 55 skjálftar mældust í Öræfajökli, sá stærsti 2,2 að stærð, þann 5. september. Fjórtán skjálftar mældust í Bárðarbungu, heldur fleiri en í síðustu viku. Stærsti skjálftinn var 2,5 að stærð í sunnanverðri Bárðarbungaöskjunni, þann 6. september. Fimm smáskjálftar mældust við Grímsfjall og tveir við Hamarinn. Einn djúpur skjálfti mældist þar sem berggangurinn beygir til norðurs og oft mælast djúpir skjálftar, sjö smáskjálftar mældust í ganginum undir og fyrir framan Dyngjujökul. Tæplega 30 smáskjálftar mældust við Öskju og 25 við Herðubreið og Herðubreiðartögl. Þrír jarðskjálftar mældust við Langjökul, sá stærsti 2,2 að stærð, þann 4. september.

Mýrdalsjökull

Fáeinir smáskjálftar mældust undir Mýrdalsjökli í vikunni, mun færri en vikuna á undan. Einn smáskjálfti mældist við Eyjafjallajökul og fjórir á Torfajökulsvæðinu.

Jarðvakt