	Veðurstofa Íslands Jarðeðlissvið

Jarðskjálftar 20180910 - 20180916, vika 37

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Um 390 jarðskjálftar mældust með SIL-mælakerfi Veðurstofu Íslands í vikunni, nokkuð fleiri en vikuna á undan. Stærsti skjálfti vikunnar var M4,4 í NV-verðri Bárðarbunguöskjunni þann 14. september kl. 10:40. Daginn áður, 13. september kl. 20:17, varð skjálfti M4,1 að stærð, um 6 km S við Bláfjallaskála. Fimm sekúntum síðar mældist annar skjálfti á sama stað, 4,0 að stærð. Skjálftarnir fundust víða á Reykjanesskaganum og í Ölfusi. Nokkur virkni var í Öræfajökli, tveir skjálftar yfir 2 að stærð urðu 11. september kl. 20:13, af stærð M2,7 og M2,4 að stærð þann 16. september kl. 19:29:03. Engar tilkynningar bárust um að skjálftarnir fyndust í byggð. Einn smáskjálfti mældist í Heklu.

Suðurland

Tæplega 45 jarðskjálftar mældust á Suðurlandi í vikunni, svipaður fjöldi og vikuna á undan. Stærsti skjálftinn var 1,7 að stærð 16. september á Hengilssvæðinu en þar mældust alls 9 skjálftar í vikunni. Einn smáskjálfti mældist í Heklu í vikunni og 8 í nágrenni hennar. Aðrir skjálftar mældust á víð og dreif um Suðurlandsbrotabeltið.

Reykjanesskagi

Um 120 jarðskjálftar mældust á Reykjanesskaga, sá stærsti var M4,1 að stærð, kl. 20:17:42 þann 13. september um 6 km S við Bláfjöll. Honum fylgdi annar skjálfti af stærð M4,0 um 5 sekúntum síðar. Þeir fundust vel á Reykjanesskaganum, höfuðborgarsvæðinu, Ölfusi og á Akranesi. Skjálftarnir voru hluti af jarðskjálftahrinu á svæðinu, sem hófst í vikunni. Flestir skjálftanna voru S af Bláfjöllum en 16. september byrjaði smáhrina í Brennisteinsfjöllum, þeirra stærstur var M2,5 að stærð kl. 03:07:49. Nokkrir smáskjálftar mældust við Kleifarvatn í vikunni, þeirra stærstur mældist M2,2 að stærð þann 10. september kl. 17:24:51. Tæplega 20 skjálftar mældust á Reykjaneshrygg, sá stærsti 2,4 að stærð þann 13. september kl. 05:15:53 í hringu við Gerifuglasker. Einnig mældust 5 smáskjálftar S af Reykjanestá 14. september.

Norðurland

Rúmlega 120 jarðskjálftar mældust á Norðurlandi, mun fleiri og í fyrri viku. Stærsti skjálftinn var 2,7 að stærð, þann 10. september, austur af Grímsey. Tæplega 70 skjálftar mældust í Grímseyjarbeltinu, þar af 48 við Grímsey og 21 í Öxarfirði. Fjórir smáskjálftar mældust á Húsavíkur- Flateyjarmisgenginu. Einn smáskjálfti mældist við Þeistareyki og þrír við Kröflu.

Hálendið

Rúmlega 40 jarðskjálftar mældust undir Vatnajökli í vikunni, mun færri en vikuna á undan. Rúmlega 40 skjálftar mældust í Öræfajökli, sá stærsti 2,7 að stærð, þann 11. september. Tíu skjálftar mældust í Bárðarbungu, heldur færri en í síðustu viku. Stærsti skjálftinn var 4,4 að stærð í sunnanverðri Bárðarbungaöskjunni, þann 14. september kl. 10:40, stærsti eftirskjálftinn var M2,9 að stærð. Fjórir smáskjálftar mældust við Grímsfjall, einn við Hamarinn og tveir á Lokahrygg. Einn djúpur skjálfti mældist þar sem berggangurinn beygir til norðurs og oft mælast djúpir skjálftar, sex smáskjálftar mældust í ganginum undir og fyrir framan Dyngjujökul. Rúmlega 10 smáskjálftar mældust við Öskju og 15 við Herðubreið og Herðubreiðartögl. Sautján jarðskjálftar mældust við sunnanverðan Langjökul, í hrinu rétt sunnan við Sandvatn. Sá stærsti 2,0 að stærð, þann 16. september. Einn skjálfti mældist við NA-verðan Hofsjökul.

Mýrdalsjökull

Tíu smáskjálftar mældust undir Mýrdalsjökli í vikunni, mun fleiri en vikuna á undan. Sá stærsti var M1,5 að stærð þann 11. september. Tæplega 20 smáskjálftar mældust á Torfajökulsvæðinu.

Jarðvakt