	Veðurstofa Íslands Jarðeðlissvið

Jarðskjálftar 20180917 - 20180923, vika 38

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Um 330 skjálftar voru staðsettir í vikunni. Stærsti skjálftinn, M 3,1, varð í Öræfajökli að kvöldi 21. september og fylgdu honum á annan tug eftirskjálfta. Skjálftahrina varð nærri Þrengslavegi í Ölfusi 22.-23 september. Stærsti skjálftinn þar varð síðdegis þann 22. og var af stærð M2,8. Einnig varð hrina skjálfta við Herðubreið þar sem á þriðja tug skjálfta mældust, flestir þann 18. september.

Suðurland

Mesta virknin á Suðurlandi varð suðaustan Hjallafjalls í Ölfusi. Þar varð hrina 40 skjálfta 21.- 23. september. Flestir skjáfltarnir urðu þann 22., og mældust þeir stærstu M 2,8 og M 2,1 að stærð. Nokkrir skjálftar mældust á Hellisheiði, nærri Hveradölum (þann 18. september), og við Hverahlíð. Auk þess mældust stakir skjálftar hér og þar í Suðurlandsbrotabeltinu, allt austur í Vatnafjöll.

Tveir skjálftar mældust í Heklu, þann 18. og 23. september, báðir um M 0,5 að stærð.

Reykjanesskagi

Um 30 skjálftar mældust á Reykjanesskaganum. Fáeinir eftirskjálftar mældust suður af Bláfjöllum, þar sem tveir skjálftar af stærð M~4 urðu í síðustu viku, þann 13. september. Skjálftar mældust einnig suðvestur af Krýsuvík, við Fagradalsfjall, á Reykjanesi og við Bláa lónið. Sex skjálftar mældust einnig norðaustur af Eldey á Reykjaneshrygg, 21.-23. september.

Norðurland

Um 20 skjálftar mældust í Tjörnesbrotabeltinu, nærri allir á Grímseyjarbeltinu, þar mældist strjál virkni allt frá Öxarfirði og norður fyrir Grímsey. Stærsti skjálftinn á svæðinu varð um 35 km NNV af Grímsey, M 2,3 að stærð. Fáeinir skjálftar mældust einnig við Kröflu og nærri Þeistareykjum, allir um og undir M 1,5 að stærð.

Hálendið

Við Öskju í Dyngjufjöllum mældist um tugur skjálfta. Flestir þeirra áttu upptök sín rétt vestur af Öskjuvatni, stærsti skjálftinn þar var af stærð M 2. Meiri skjálftavirkni mældist við Herðubreið, þar urðu hátt á þriðja tug skjálfta, flestir í hrinu þann 18. september. Skjálftarnir voru allir litlir (um og undir M 1,3).

Vatnajökull:

Aðeins tveir skjálftar voru staðsettir í Bárðarbunguöskjunni í vikunni. Sjö djúpir skjálftar mældust um 10 km SSA hennar, nær allir 23. september. Þá mældust nokkrir skjálftar í bergganginum, við jaðar Dyngjujökuls, og tveir skjálftar skammt suður af Kistufelli.

Fimm skjálftar mældust á Lokahrygg, sá stærsti af stærð M 2,2, og fimm skjálftar mældust í Grímsvötnum, sá stærsti þar var um M 1,4 að stærð.

Öræfajökull

Hátt í 70 skjáfltar voru staðsettir í Öræfajökli, nokkuð fleiri en undanfarnar þrjár vikur. Mesta virknin var við austanverðan öskjurimann þar sem stærsti skjálfti vikunnar, M 3,1, varð 21. september kl. 21:15. Honum fylgdu á annan tug eftirskjálfta. Næststærsti skjálftinn mældist M 2,2 að stærð og varð skammt NNV af Hvannadalshjúk. Einn skjálfti var staðsettur undir Skaftafellsheiði.

Mýrdalsjökull

Ríflega tugur skjálfta mældist í Mýrdalsjökli, bæði norðan til í Kötluöskjunni og í syðri hluta hennar, tveir skjálftar voru um M 1,3 að stærð, aðrir minni. Tveir litlir skjálftar voru staðsettir við Goðabungu.

Á Torfajökulssvæði voru á annan tug skjáflta staðsettir. Tveir þeirra urðu vestast í öskjunni, aðrir í suðausturhluta hennar þar sem stærsti skjálftinn á svæðinu mældist, M 1,7 þann 18. september.

Jarðvakt