	Veðurstofa Íslands Jarðeðlissvið

Jarðskjálftar 20181008 - 20181014, vika 41

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Um 250 jarðskjálftar mældust með SIL-mælakerfi Veðurstofu Íslands í vikunni, heldur færri en vikuna á undan þegar um 300 jarðskjálftar mældust. Virkni var svipuð eða minni á öllum svæðum nema Suðurlandsundirlendinu þar sem hún var aðeins meiri en vikuna á undan. Stærsti skjálfti vikunnar var 2,5 að stærð í austanverðri Öskju þann 12. október kl 02:49. Sjö skjálftar undir einum að stærð mældust við Heklu 14. október. Rólegt var í Mýrdalsjökli og Bárðarbungu, en einnig var minni virkni í Öræfajökli miðað við vikuna á undan.

Suðurland

Rúmlega 50 jarðskjálftar mældust á Suðurlandi í vikunni, þar af 34 á Suðurlandsbrotabeltinu, nokkuð fleiri en vikuna á undan. 17 skjálftar mældust á Hengilssvæðinu, sá stærsti 1,7 að stærð. Sjö skjálftar undir einum að stærð mældust í suðvestanverðri Heklu 14. október, flestir á 3-4 km dýpi.

Reykjanesskagi

Rúmlega 20 jarðskjálftar mældust á Reykjanesskaga í vikunni, mun færri en vikuna á undan þegar tæplega 60 skjálftar mældust. Flestir skjálftar mældust við Langahrygg og Kleifarvatn. Stærsti skjálftinn var 1,6 að stærð. Þrír skjálftar mældust á Reykjaneshrygg, sá stærsti 2,2 stig.

Norðurland

Tæplega 40 jarðskjálftar mældust á Tjörnesbrotabeltinu í vikunni, svipaður fjöldi og vikuna á undan. Tæplega 30 skjálftar mældust á Grímseyjarbeltinu, sá stærsti 1,8 að stærð og rúmlega tugur á Húsavíkur-Flateyjar misgenginu, sá stærsti 1,3 að stærð. Átta smáskjálftar mældust við Þeistareyki og sex við Kröflu.

Hálendið

55 jarðskjálftar mældust undir Vatnajökli í vikunni, mun færri en í vikunni á undan þegar þeir voru tæplega 120. Tæplega 40 skjálftar mældust í Öræfajökli, mun færri en í síðustu viku þegar um 90 skjálftar mældust. Stærsti skjálftinn var 1,4 að stærð. Fjórir skjálftar mældust í Bárðarbungu í vikunni, sami fjöldi og vikuna á undan. Einn djúpur skjálfti mældist þar sem berggangurinn beygir til norðausturs og oft mælast djúpir skjálftar. Níu skjálftar mældust við Grímsvötn, sá stærsti 1,9 að stærð. Átta skjálftar mældust í austanverðri Öskju, sá stærsti 2,5 að stærð 12. október kl 02:49 sem jafnframt var stærsti skjálfti vikunnar. Tæplega 40 jarðskjálftar mældust við Herðubreið og Herðubreiðartögl, sá stærsti 1,3 að stærð. Einn skjálfti, 1,2 að stærð mældist í Borgarfirði og einn smáskjálfti mældist suður af Langjökli.

Mýrdalsjökull

Einn skjálfti, 2,0 að stærð mældist í Kötlu í vikunni, mun færri en vikuna á undan þegar fimm skjálftar mældust. 12 skjálftar mældust á Torfajökulssvæðinu, sá stærsti 1,8 að stærð.

Jarðvakt