	Veðurstofa Íslands Jarðeðlissvið

Jarðskjálftar 20181029 - 20181104, vika 44

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Rúmlega 350 jarðskjálftar mældust með SIL-mælakerfi Veðurstofu Íslands í vikunni, talsvert fleiri en vikuna á undan þegar um 270 jarðskjálftar mældust. Stærsti skjálfti vikunnar var 3,5 að stærð um 550 km norðaustur af Íslandi við Jan Mayen þann 30. október kl.7 að morgni. Um 25 skjálftar mældust í Öræfajökli í vikunni, flestir staðsettir norðvestan megin við og í öskjunni. Um 50 smáskjálftar mældust norðvestur af Herðubreið þann 31. október og 1.nóvember, stærsti skjálftinn var 1,5 að stærð.

Suðurland

Rúmlega 40 jarðskjálftar mældust á Suðurlandi í vikunni, þar af 27 á Suðurlandsbrotabeltinu, helmingi fleiri en vikuna á undan. 11 skjálftar mældust á Hengilsvæðinu, sá stærsti 2,0 að stærð. Aðeins 1 skjálfti mældist í Heklu, sá var 0,6 að stærð.

Reykjanesskagi

17 jarðskjálftar mældust á Reykjanesskaga í vikunni, nær helmingi færri en vikuna á undan þegar 40 skjálftar mældust. Flestir skjálftar mældust suðvestan við Kleifarvatn þann 29. október. Stærsti skjálftinn var 2,2 að stærð. 3 skjálftar undir 1,5 að stærð mældust á Reykjaneshrygg.

Norðurland

12 skjálftar mældust norður af Íslandi í vikunni, sá stærsti 3,5 við Jan Mayen. 9 skjálftar mældust þann 29. og 30. október á Kolbeinseyjarhrygg , sá stærstu 2,8 að stærð. Rúmlega 25 jarðskjálftar mældust á Tjörnesbrotabeltinu í vikunni, töluvert færri en vikuna á undan þegar rúmlega 40 skjálftar mældust. Sá stærsti 2,0 að stærð þann 31. október kl 05:04 um 10 km vestur af Siglufirði. 10 skjálftar mældust á Húsavíkur-Flateyjarmisgenginu og um 14 á Grímseyjarbeltinu, sá stærsti 1,8 að stærð. 4 skjálftar mældust við Kröflu og 3 við Námafjall austan við Mývatn. Aðrir smáskjálftar mældust á víð og dreif um Norðurlandið, þar af 2 við Þeistareyki, 4 í Kelduhverfi og 1 við Fljót norðan við Stífluvatn.

Hálendið

Rúmlega 180 jarðskjálftar mældust á hálendinu í vikunni, þar af 85 undir Vatnajökli. 26 skjálftar mældust í Öræfajökli, nær helmingi færri en vikuna á undan og voru flestir staðsettir norðvestan við og í öskjunni. Stærsti skjálftinn mældist 1,9 að stærð rétt fyrir miðnætti þann 3. nóvember. 34 skjálftar mældust í Bárðarbungu, töluvert fleiri en vikuna á undan, þegar þeir voru rúmlega 20 talsins. Auk þess mældust 14 skjálftar í bergganginum endalangum. 7 skjálftar mældust á víð og dreif í kringum Grímsvötn. Rúmlega 75 skjálftar mældust við Herðubreið, þar af um 50 smáskjálftar staðsettir 2,3 km norðvestur af Herðubreið. 10 skjálftar mældust við Öskju í vikunni, sá stærsti 2,0 að stærð. 7 smáskjálftar mældust norðan við Sandvatn, suðaustan við Langjökul, þann 31. október og 1. nóvember.

Mýrdalsjökull

Rúmlega 25 jarðskjálftar, allir undir 1,0 að stærð, mældust í Mýrdalsjökli í vikunni, þar af 16 við yfirborð í Kötlujökli. 12 skjáftar mældust á Torfajökulssvæðinu, sá stærsti var 1,1 að stærð en aðrir undir 1,0 að stærð.

Náttúrvársérfræðingur á vakt fyrirspurnir@vedur.is>Jarðvakt