	Veðurstofa Íslands Jarðeðlissvið

Jarðskjálftar 20181112 - 20181118, vika 46

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Um 250 jarðskjálftar mældust með SIL-mælakerfi Veðurstofu Íslands í vikunni, talsvert færri en vikuna á undan þegar um 410 jarðskjálftar mældust. Stærsti skjálfti vikunnar var 3,6 að stærð í Bárðarbungu þann 12. nóvember kl.19:22, annar skjálfti af stærð 3,3 fylgdi í kjölfarið um það bil mínútu síðar. Um 80 skjálftar mældust undir Vatnajökli, af þeim voru tæplega 20 við Öræfajökul. Einnig mældist skjálfti af stærðinni 2,8 í Öskju að morgni 14. nóvember, sem er næststærsti skjálftinn þar í ár.

Suðurland

Um 26 skjálftar mældust á Suðurlandsbrotabeltinu sem er svipaður fjöldi og í síðustu viku. Stærsti skjálftinn var 2,3 sunnan við Hveragerði. Að auki mældist einn skjálfti af stærð 1,4 úti á Selvogsgrunni. Átta smáskjálftar mældust á Hengilssvæðinu. Tveir skjálftar mældust í Heklu, 0,9 og 1,4 að stærð. Einnig mældist einn skjálfti í Vatnafjöllum í nágrenni Heklu.

Reykjanesskagi

34 jarðskjálftar mældust á Reykjanesskaga í vikunni, sem eru fleiri en í síðustu þegar 20 jarðskjálftar mældust. Stærsti skjálftinn var 1,8 að stærð við Grindavík. Lítil hrina, um 20 skjálftar, varð sunnan við Fagradalsfjall þar sem stærsti skjálftinn var 1,7. Að auki mældust þrír skjálftar 10-50 km út af Reykjanesi af stærð 1,3-2,1.

Norðurland

Tæplega 60 skjálftar urðu á Tjörnesbrotabeltinu í vikunni, þar sem stærsti skjálftinn var 2,2, um 40 kílómetra norður af mynni Eyjafirði. Flestir af þessum skjálftum urðu í lítilli hrinu í Öxarfirði þann 14. nóvember eða rúmlega 20. Sex skjálftar mældustu við Kröflu, tveir við Þeistareyki og þrír í Kelduhverfi.

Hálendið

Um 80 skjálftar mældust undir Vatnajökli í vikunni, svipað og í síðustu viku þegar rúmlega 70 skjálftar mældust. Tæplega 20 skjálftar mældust í og við Öræfajökul, þar sem stærsti skjálftinn mældist 1,6. Tæplega 40 jarðskjálftar voru staðsettir í og við öskjuna í Bárðarbungu, þar urðu stærstu skjálftarnir 3,6 og 3,3 kvöldið 12. nóvember. Auk þess voru níu skjálftar í bergganginum sem liggur úr öskju Bárðarbungu. Um tíu skjálftar mældust við Grímsvötn, þar sem þrír skjálftar voru stærri en 1,0 að stærð. Sex skjálftar urðu í Öskju, sá stærsti 2,8. Fjórir skjálftar mældust í kringum Herðubreið og einn við Herðubreiðarfjöll.

Mýrdalsjökull

Sex skjálftar mældust í Mýrdalsjökli, sá stærsti 2,1 við Goðabungu. Einn skjálfti af stærð 1,0 mældist vestan við Eyjafjallajökul. Tveir smáskjálftar mældust í Torfajökulsöskjunni, annar við jökulinn og hinn í Rauðfossafjöllum. Auk þess mældust tveir skjálftar austan við öskjuna.

Jarðvakt