	Veðurstofa Íslands Jarðeðlissvið

Jarðskjálftar 20181126 - 20181202, vika 48

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Rúmlega 400 jarðskjálftar mældust með SIL-mælakerfi Veðurstofu Íslands í vikunni, færri en vikuna á undan þegar þeir voru rúmlega 460. Þrír stærstu skjálftar vikunnar voru 2,6 að stærð, einn við Kolbeinsey þann 27. nóvember og tveir við Herðubreið þann 27. og 29. nóvember. Sex smáskjálftar mældust við Heklu, allir minni en 1,0 að stærð. Töluvert meiri virkni var í Bárðarbungu og Öræfajökli samanborið við vikuna á undan, virkni í Mýrdalsjökli var svipuð og í vikunni áður.

Suðurland

Um 30 skjálftar mældust á Hengilssvæðinu, nokkuð fleiri en í síðustu viku þegar 15 skjálftar mældust. Þrír stærstu skjálftarnir urðu að morgni 29. nóvember í Hverahlíð. Skjálftarnir voru á bilinu 1,9-2,3 að stærð. Rúmlega 40 jarðskjálftar mældust á Suðurlandsbrotabeltinu sem er svipaður fjöldi og í síðustu viku. Flestir skjálftarnir urðu í smáhrinu um 10 km norðaustan við Selfoss þann 27. nóvember. Sex skjálftar mældust við Heklu, allir undir einum að stærð.

Reykjanesskagi

Töluvert færri skjálftar mældust á Reykjanesskaga í þessarri viku miðað við þá síðustu eða 16 samanborið við 65. Stærsti skjálftinn var 1,8 að stærð í Bláfjöllum. Tveir skjálftar af stærð 1,8 og 1,9 mældust á Reykjaneshrygg í vikunni.

Norðurland

Rúmlega 60 skjálftar mældust á Tjörnesbrotabeltinu í vikunni, færri en vikuna á undan þegar um 90 jarðskjálftar mældust. Stærsti skjálftinn var 2,0 að stærð norðaustan við Grímsey þann 30. nóvember. Fjórir smáskjálftar mældust vð Kröflu og aðrir fjórir við Þeistareyki.

Hálendið

Um 140 jarðskjálftar mældust undir Vatnajökli í vikunni, töluvert fleiri en í vikunni á undan þegar rúmlega 90 jarðskjálftar mældust. Um 50 skjálftar mældust í Öræfajökli í vikunni, sem er töluvert meira en síðustu vikur, þegar um 20 skjálftar hafa mælst vikulega. Stærsti skjálftinn í Öræfajökli þessa vikuna var 1,5 að stærð. Helmingur skjálftanna urðu í smáhrinu í sunnanverðri öskjunni seinnipart 1. desember. Rúmlega 40 jarðskjálftar mældust í Bárðarbungu, nokkuð fleiri en í síðustu viku þegar um 20 skjálftar mældust. Einnig mældust tæplega 20 skjálftar í ganginum frá Bárðarbungu. Stærsti skjálfti vikunnar var 2,4 að stærð og staðsettur á norðanverðum öskjurimanum. Fjórir skjálftar mældust við Grímsvötn sá stærsti 1,7 að stærð. Þrír skjálftar mældust á milli Pálsfjalls og Þórðarhyrnu, sá stærsti 2,2 að stærð. Einnig mældust þrír jarðskjálftar í Kverkfjöllum. Fjórir smáskjálftar mældust í Skaftárjökli. Í kringum Herðubreið og Herðubreiðartögl mældust 45 jarðskjálftar þar sem tveir stærstu skjálftarnir voru 2,6 að stærð. Sjö smáskjálftar mældust við Öskju í vikunni.

Mýrdalsjökull

Fjórtán skjálftar mældust undir Mýrdalsjökli í vikunni, svipaður fjöldi og í síðustu viku. Flestir þeirra voru í austanverðri öskjunni og undir Kötlujökli. Stærsti skjálftinn í Mýrdalsjökli í vikunni var 1,3 að stærð. Sjö jarðskjálftar mældust víðsvegar á Torfajökulssvæðinu, sá stærsti var 1,3 að stærð austan við Rauðfossafjöll.

Jarðvakt