	Veðurstofa Íslands Jarðeðlissvið

Jarðskjálftar 20190121 - 20190127, vika 04

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Um 360 jarðskjálftar voru staðsettir með SIL-mælakerfi Veðurstofu Íslands í vikunni, nokkuð fleiri en í vikunni á undan, þegar skjálftarnir voru um 210 talsins. Stærsti skjálfti vikunnar var 3,7 að stærð, þann 27. janúar kl. 10:02, 8 km VNV af Hrafntinnuskeri í vestanverðri Torfajökulsöskjunni. Tveir skjálftar af stærðinni 3,0 urðu á Reykjaneshrygg þann 25. janúar og einn af sömu stærð við Kleifarvatn 26. janúar. Skjálftarnir á Reykjaneshrygg voru annarsvegar um 11 km vestur af Reykjanestá og hinsvegar um 44 km suðvestur af sama stað. Svipuð virkni var í Öræfajökli, Bárðarbungu, Grímsvötnum og Mýrdalsjökli samanborið við síðustu viku. Þrír skjálftar mældust í Heklu, sá stærsti 1,3 að stærð.

Suðurland

Tæplega 20 jarðskjálftar mældust á Suðurlandsbrotabeltinu, sem er svipaður fjöldi og í vikunni á undan. Stærsti skjálftinn á þessu svæði var 1,2 að stærð. Tíu skjálftar mældust á Hengilssvæðinu í þessarri viku sem er einnig svipuð virkni og í vikunni áður. Stærsti skjálftinn var 1,5 að stærð við Ölkelduháls þar sem meirihluti skjálftanna varð, en einnig mældust tveir skjálftar á Nesjavöllum og einn í Hverahlíð. Þrír skjálftar urðu í Heklu að kvöldi 21. janúar á 30 mínútna kafla. Skjálftarnir voru á stærðarbilinu 0,4 ¿ 1,3.

Reykjanesskagi

Í þessarri viku mældust samtals um 115 jarðskjálftar á Reykjanesskaga og Reykjaneshryggnum sem er töluvert meiri virkni miðað við síðustu viku þegar rúmlega 20 skjálftar mældust á þessu svæði. Meirihluti skjálftanna tilheyrðu tveimur hrinum, skammt vestur af Reykjanestá og í minniháttar hrinu á Krýsuvíkursvæðinu. Frá 23. til 26. janúar mældust um 70 skjálftar 11 km vestur af Reykjanestá. Stærsti skjálftinn þar var 3,0 að stærð þann 25. janúar kl. 14:31, fimm aðrir skjálftar voru stærri en 2,0 að stærð, aðrir minni. Flestir skjálftanna voru staðsettir á 7-10 km dýpi. Dagana 26. og 27. janúar mældust um 20 skjálftar í nágrenni Krýsuvíkur. Stærstu skjálftarnir voru 3,0 og 2,9 að stærð, þeir urðu annarsvegar kl. 3:06 þann 26. janúar og 12:36 þann 27. janúar. Aðrir skjálftar á þessu svæði voru minni en 2,0 að stærð. Tæplega 50 km suðvestur af Reykjanestá mældust fimm jarðskjálftar þann 25. janúar. Sá stærsti var 3,0 að stærð, hinir fjórir voru á bilinu 1,7-2,7 að stærð. Af öðrum skjálftum á Reykjanesi í vikunni má nefna tíu skjálfta við Reykjanestá, fjóra við Fagradalsfjall, þrjá í Bláfjöllum og einn við Grindavík. Engar tilkynningar bárust Veðurstofunni um að stærstu skjálftarnir á þessu svæði hefðu fundist í byggð.

Norðurland

Rúmlega 60 jarðskjálftar mældust á Tjörnesbrotabeltinu í vikunni sem er svipaður fjöldi og í síðustu viku. Flestir skjálftanna urðu á Grímseyjarbeltinu, í Öxarfirði og við Grímsey. Stærstu skjálftarnir voru 2,3 og 2,2 að stærð í Öxarfirði. Einnig urðu tveir skjálftar nyrst á Tröllaskaga, tveir fyrir utan mynni Eyjafjarðar og einn í Skjálfanda. Átta skjálftar voru á Kröflusvæðinu, allir undir einum að stærð, og tveir smáskjálftar suðaustan við Þeistareyki.

Hálendið

55 jarðskjálftar mældust undir Vatnajökli í vikunni, svipaður fjöldi og í síðustu viku. Tólf jarðskjálftar mældust við Öræfajökul, örlítið fleiri en í síðustu viku þegar þeir voru sjö. Allir skjálftarnir voru undir 1,0 að stærð og dreifðust víða, innan og utan öskjunnar. Í Grímsvötnum mældust þrír skjálftar frá 1,2 til 2,5 að stærð, sem var stærsti skjálftinn undir Vatnajökli í vikunni. Níu skjálftar mældust í Bárðarbunguöskjunni, sá stærsti 2,4 að stærð. Einnig mældust 8 skjálftar SSA við öskjuna þar sem gangurinn beygir til norðausturs, fjórir þeirra mældust á tíu mínútna kafla seinnipartinn 27. janúar sem kom fram sem hækkun á óróagröfum. Skjálftarnir voru á stærðarbilinu 1,1 til 1,5 og voru á um það bil 14 til 18 km dýpi. Einnig mældust þrír skjálftar norðar í ganginum sjálfum. Sex smáskjálftar mældust norðan við Skaftafell, í Skaftafellsjökli og Morsárjökli. Fimm skjálftar mældust vestan við Esjufjöll, allir undir 1,0 að stærð. Fjórir skjálftar mældust í nágrenni Skaftárkatlanna, sá stærsti 1,0 að stærð. Fjórir smáskjálftar mældust við Öskju og tæplega 20 við Herðubreið og Herðubreiðartögl, þar sem stærsti skjálftinn mældist 2,0 að stærð. Tveir skjálftar af stærð 1,7 og 1,0 mældust í suðvestanverðum Langjökli og einn skjálfti við Skjaldbreiður af stærð 1,1.

Mýrdalsjökull

Tíu jarðskjálftar mældust undir Mýrdalsjökli í vikunni, sem er svipaður fjöldi og í vikunni á undan. Flestir þeirra voru staðsettir undir austurhluta jökulsins. Stærsti skjálftinn var 1,2 að stærð en einnig voru tveir skjálftar sem voru staðsettir á 17 og 20 km dýpi við austurbrún Kötluöskjunnar. Sunnudaginn 27. janúar kl. 10:02 mældist jarðskjálfti af stærð 3,7, 8 km VNV af Hrafntinnuskeri í norðvesturhluta Torfajökulsöskjunnar. Tilkynning barst Veðurstofunni um að skjálftinn hafi fundist í Fljótshlíð. Um 40 eftirskjálftar mældust sama dag á svæðinu, sá stærsti 2,3 að stærð.

Jarðvakt