	Veðurstofa Íslands Eftirlits- og spársvið

Jarðskjálftar 20190204 - 20190210, vika 06

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Rúmlega 220 jarðskjálftar voru staðsettir með SIL-mælakerfi Veðurstofu Íslands í sjöttu viku, heldur færri en vikuna á undan þegar rúmir 265 skjálftar voru staðsettir. Stærsti skjálfti vikunnar af stærð 3,3 mældist langt norður á Kolbeinseyjarhrygg. Við Reykjanestá var skammvin skjálftahrina sem taldi um 40 skjálfta þann 6. febrúar. Færri skjálftar mældust í Öræfajökli í vikunni en vikuna á undan. Í Hofsjökli mældist skjálfti 5. febrúar af stærð 2,2.

Suðurland

Rúmlega 30 jarðskjálftar voru staðsettir á Suðurlandi í vikunni, 20 skjálftar mældust á víð og dreif á Suðurlandsbrotabeltinu, sá stærsti 1,5 að stærð sunnan Vaðness Grímsnesi, 6. febrúar. 12 skjálftar voru staðsettir á Hengilssvæðinu, stærsti var einnig 1,5 að stærð, þann 5. febrúar um 5 km norður af Hveragerði. Einn skjálfti mældist við Heklu 0,3 að stærð.

Reykjanesskagi

Tæplega 70 skjálftar voru staðsettir á Reykjanesskaga í vikunni. Um 40 þeirra mældust í skammvinnri skjálftahrinu við Reykjanestá 6. febrúar, stærsti skjálfti vikunnar á Reykjanesi, 2,8 að stærð mældist þar kl. 11:30. Um 20 skjálftar mældust við Kleifarvatn, 2 við Fagradalsfjall, 2 í Brennisteinsfjöllum og 3 í Bláfjöllum. Úti fyrir landi mældust 10 skjálftar á Reykjneshrygg, stærsti 2,9 að stærð þann 9. febrúar.

Norðurland

Um 30 jarðskjálftar voru staðsettir á og úti fyrir Norðurlandi í vikunni, tveir við Kröflu og einn við Einbúa. Stærsti skjálftinn af stærð 3,3 mældist langt norður á Kolbeinseyjarhrygg um 150 km suðvestur af Jan Mayen, það reyndist stærsti mældi skjálfti vikunnar. Flestir skjálftanna komu á Tjörnesbrotabeltinu.

Hálendið

50 jarðskjálftar mældust í Vatnajökli í vikunni, þar af voru 17 skjálftar staðsettir í Öræfajökli, stærsti 2,6 að stærð þann 4. febrúar. 8 skjálftar mældust í Bárðarbungu í vikunni, stærsti 2,2 að stærð, 4. febrúar. 3 skjálftar af stærðum 1,2 til 1,4 að stærð mældust í Grímsvötnum. 1 skjálfti við Þórðarhyrnu 1,4 að stærð. 7 djúpir skjálftar voru staðsettir um 17 km austsuðaustur af Bárðarbungu í berganginum svokallaða og aðrir 4 undir Dyngjujökli.
Tæplega 25 skjálftar voru staðsettir við Öskju og Herðubreið, sá stærsti 1,6 að stærð í austurhlíðum Öskju 4. febrúar.Tveir djúpir skjálftar undir 1 að stærð mældust í Sandadal um 10km vestur af Hálslóni. Í Hofsjökli var skjálfti 5. febrúar af stærð 2,2. Annar stakur jarðskjálfti, um 1 að stærð mældist í Lambahrauni sunnan Langjökuls.

Mýrdalsjökull

Þrír skjálftar mældust undir Mýrdalsjökli í vikunni allir undir einum að stærð. 5 skjálftar mældust á Torfajökulssvæðinu, stærsti 1,8 að stærð, 9 febrúar, í sunnanverðri öskjunni.

Náttúruvársérfræðingur á vakt