	Veðurstofa Íslands Jarðeðlissvið

Jarðskjálftar 20190311 - 20190317, vika 11

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Rúmlega 290 jarðskjálftar voru staðsettir með SIL-mælakerfi Veðurstofu Íslands í vikunni, nokkuð fleiri en vikuna á undan, þegar 260 mældust. Stærsti skjálfti vikunnar var 3,0 að stærð þann 16. mars kl. 17:30, í Geitlandsjökli. Fjórir aðrir skjálftar stærri en 2,0 að stærð mældust sama dag í Geitlandsjökli. Svipuð virkni var í Öræfajökli miðað við síðustu viku, en virkni í Bárðarbungu og Kötlu var minni en í síðustu viku.

Suðurland

Á Suðurlandsbrotabeltinu mældust tæplega 20 skjálftar á víð og dreif um svæðið. Stærsti skjálftinn var 2,0 að stærð þann 15. mars um 12 km suðvestur af Heklu. Þetta voru færri skjálftar miðað við í síðustu viku þegar þeir voru um 30. Tólf jarðskjálftar mældust á Hengilssvæðinu nokkuð færri en í síðustu viku þegar 25 skjálftar mældust. Stærsti skjálftinn var 1,5 að stærð þann 16. mars vestan við Ölkelduháls. Enginn skjálfti mældist í Heklu í þessarri viku.

Reykjanesskagi

Átján skjálftar mældust víðsvegar um Reykjanesskagann í vikunni sem er svipaður fjöldi og í síðustu viku. Stærstu skjálftarnir voru 2,2 og 2,0 að stærð þann 16. mars sunnan við Kleifarvatn. Einn skjálfti af stærð 1,5 mældist úti á Reykjaneshrygg um 10 km vestur af Reykjanestá.

Norðurland

Tæplega 60 skjálftar urðu á Tjörnesbrotabeltinu, sem er nokkuð fleiri en í síðustu viku þegar þeir voru um 40. Stærsti skjálftinn á svæðinu var 2,6 að stærð í Eyjafjarðardjúpi þann 11. mars um 40 km norður af Siglufirði. Næststærsti skjálftinn var 2,0 að stærð á Skjálfanda þann 17. mars. Nokkur smáskjálftavirkni var í Öxarfirði þar sem um helmingur allra skjálftanna sem urðu í vikunni á Tjörnesbrotabeltinu voru staðsettir, þar var stærsti skjálftinn 1,4 að stærð. Í vikunni urður fjórir smáskjálftar á Þeistareykjasvæðinu og sjö jarðskjálftar á Kröflusvæðinu. Rúmlega 40 skjálftar mældust við Herðubreið og Herðubreiðartögl í vikunni og var stærsti skjálftinn 2,0 að stærð þann 13. mars. Í og við Öskju mældust þrettán skjálftar í vikunni allir undir 2,0 að stærð. Þann 17. mars mældust tæplega 20 jarðskjálftar í tveimur lotum, annars vegar milli kl. 2 og 4 um nóttina og síðan milli kl. 18 og 23 um kvöldið, milli Stóru- og Litlu Kistu um 6 km norðaustan við Öskjuvatn. Þessir skjálftar voru á um 15-21 km dýpi.

Hálendið

Um 40 jarðskjálftar mældust undir Vatnajökli í vikunni, sem er nokkuð færri en í síðustu viku þegar 70 skjálftar mældust. Svipuð virkni var í Öræfajökli og í síðustu viku, rúmlega tíu skjálftar á víð og dreif um jökulinn. Stærsti skjálftinn var 1,1 að stærð. Í öskju Bárðarbungu mældust fimm skjálftar, töluvert færri en í síðustu viku þegar þeir voru um 20. Einnig mældust fimm skjálftar í bergganginum úr Bárðarbunguöskjunni og einn djúpur skjálfti suðaustan við öskjuna. Í Grímsvatnaöskjunni mældist einn skjálfti af stærð 1,7 og rétt sunnan við Grímsvötn mældust þrír skjálftar á stærðarbilinu 0,7 til 1,2. Fjórir skjálftar mældust á svæðinu austan við Hamarinn, í nágrenni Skaftárkatlanna, sá stærsti 1,7 að stærð þann 16. mars. Tveir smáskjálftar mældust við Tungnafellsjökul og tveir skjálftar af stærðinni 1,4 og 1,8 urðu norðan við Langjökul í vikunni. Stærstu skjálftar á landinu í þessari viku urðu í Geitlandsjökli í suðvestanverðum Langjökli. Þar mældust um 25 skjálftar frá 14. til 17. mars. Stærstu skjálftarnir urðu 16. mars og voru þeir á bilinu 2,6 til 3,0 að stærð.

Mýrdalsjökull

Ellefu skjálftar mældust í Mýrdalsjökli í vikunni, flestir í austanverðri öskjunni. Stærsti skjálftinn á svæðinu var 1,3 að stærð. Fjórtán skjálftar mældust í Torfajökulsöskjunni í þessarri viku, sá stærsti 2,0 að stærð.

Jarðvakt