	Veðurstofa Íslands Jarðeðlissvið

Jarðskjálftar 20190318 - 20190324, vika 12

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Suðurland

40 skjálftar mældust á Suðurlandi í síðustu viku, samanborið við rúmlega 30 talsins vikuna á undan. 23 jarðskjálftar mældust á Hengilssvæðinu 19. og 23. mars, sá stærsti var 2,0 að stærð. Á Nesjavöllum mældist skjálfti af stærð 0,4 þann 21. mars. Þann 23. mars varð stakur smáskjálfti í suðaustanverðu Ingólfsfjalli og 21. mars urðu þrír skjálftar 5 km norðaustur af Selfossi, sá stærsti 1,7 að stærð. Aðrir smáskjálftar voru dreifðir um Suðurlandsbrotarbeltið. Tveir skjálftar af stærð 1,0 og 0,1, mældust í Heklu þann 22. mars.

Reykjanesskagi

Rólegt var á Reykjanesskaganum í vikunni þegar sjö skjálftar mældust, samanborið við síðustu tvær vikur þegar þeir voru tæplega 20 talsins. Stærstur var 1,7 að stærð milli Kleifarvatns og Krísuvíkur. Á Reykjaneshrygg mældust þrír skjálftar, á stærðarbilinu 2,0 til 2,7 að stærð um 35 km suðvestur á hrygg.

Norðurland

Tæplega 350 skjálftar urðu á Norðurlandi í vikunni, þar af um 250 í jarðskjálftahrinu sem hófst eftir miðnætti þann 18.mars, um 6 km norðaustur af Grímsey. Þar mældist stærsti skjálfti vikunnar, 3,3 að stærð. Næststærsti skjálftinn mældist 3,2 að stærð daginn eftir í sömu hrinu. Í Öxarfirði mældust tæplega 60 skjálftar, flestir þeirra urðu þann 24. mars um 4,5 km suðvestur af Kópaskeri. Fjórir jarðskjálftar mældust í Eyjafjarðardjúpi og ellefu í Skjálfanda. Í Eyjafirði mældist stakur smáskjálfti þann 18. mars. 5 skjálftar mældust við Bæjarfjall og sitthvor smáskjálfti við Gæsafjöll og Kröflu.

Hálendið

Um 100 jarðskjálftar mældust á hálendinu í vikunni, töluvert færri en vikuna á undan þegar að tæplega 150 skjálftar mældust. Í vestanverðum Langjökli mældist skjálfti af stærð 1,3 þann 19. mars og daginn áður mældist skjálfti af stærð 1,4 í norðaustanverðum Hofsjökli. Í Tungnafellsjökli mældust 6 skjálftar, sá stærsti 1,4 af stærð þann 24. mars. Tæplega 40 skjálftar urðu í Vatnajökli í vikunni, sem var svipaður fjöldi og vikuna á undan. 11 skjálftar mældust í Öræfajökli, flestir þeirra voru staðsettir suðaustan við öskjuna og voru þeir allir undir 1 að stærð. 6 skjálftar urðu við Grímsvötn og 6 við Hamarinn. 7 skjálftar urðu í Bárðarbunguöskjunni og í ganginum mældust 6 skjálftar, sá stærsti 1 að stærð á 18 km dýpi þar sem að gangurinn beygir til norðurs. Rúmlega 30 jarðskjálftar mældust við Herðubreið í vikunni og 7 við Öskju.

Mýrdalsjökull

16 skjálftar mældust í Mýrdalsjökli í vikunni og var stærsti skjálftinn 1,7 að stærð. Flestir voru staðsettir í austanverðri öskjunni ýmist við yfirborð eða allt niður á um 23 km dýpi. Við Hrafntinnusker mældust 5 skjálftar, sá stærsti 1,9 að stærð þann 24. mars.

Jarðvakt