	Veðurstofa Íslands Jarðeðlissvið

Jarðskjálftar 20190415 - 20190421, vika 16

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Um 270 jarðskjálftar voru staðsettir með SIL-mælakerfi Veðurstofu Íslands í vikunni, mun færri en í síðustu viku þegar um 530 jarðskjálftar mældust. Munar þar mestu um að jarðskjálftahrinu sem hófst 23. mars um 6 km suðvestur af Kópaskeri er að mestu lokið. Minni eða svipuð virkni var á flestum svæðum samanborðið við fyrri viku, nema á Reykjanesskaga þar sem virkni var aðeins meiri. Stærsti skjálfti vikunnar var 2,7 að stærð langt suður á Reykjaneshrygg, eða um 190km suðvestur af Reykjanestá. Tveir smáskjálftar mældust við Heklu og átta í Öræfajökli.

Suðurland

Tæplega 20 skjálftar mældust á Suðurlandi í vikunni, þarf af um tugur á Suðurlandsbrotabeltinu og sjö á Hengilssvæðinu, færri en í síðustu viku. Tveir skjálftar mældust við Heklu, báðir undir einum að stærð. Skjálfti 1,9 að stærð mældist rúmlega 37 km vestur af Vestmannaeyjum 20. apríl.

Reykjanesskagi

20 jarðskjálftar mældust á Reykjanesskaga, fleiri en í síðustu viku. Helmingur þeirra mældist við Reykjanestá, sá stærsti 2,3 að stærð. Sjö skjálftar mældust við Hvalhnúk austan við Brennisteinsfjöll. Einn skjálfti mældist við Kleifarvatn og einn við Fagradalsfjall.

Fimm skjálftar undir tveimur að stærð mældust um 12 km vestur af Reykjanestá. Að auki mældist einn skjálfti 2,7 að stærð þann 18. apríl kl 09:03 um 190km suðvestur af Reykjanestá sem jafnframt var stærsti skjálfti vikunnar.

Norðurland

Tæplega 120 jarðskjálftar mældust á Tjörnesbrotabeltinu í vikunni, meira en helmingi færri en í vikunni á undan þegar þeir voru um 250. Mesta virknin var á Grímseyjarbeltinu. Rúmlega 50 skjálftar mældust í Öxarfirði, allir undir tveimur að stærð, suðvestur af Kópaskeri þar sem skjálftahrina hófst 23. mars síðastliðinn. Dregið hefur verulega úr hrinunni en enn mælast skjálftar á svæðinu. Tæplega 20 skjálftar mældust norðaustur af Grímsey, sá stærsti 2,6 að stærð 16. apríl kl 08:38 og var hann næststærsti skjálfti vikunnar. Tæplega 40 jarðskjálftar mældust á Húsavíkur-Flateyjar misgenginu, sá stærsti 2,4 að stærð. Einn skjálfti mældist við Mývatn, þrír við Kröflu, fjórir við Bæjarfjall og einn við Þórunnarfjöll vestur og suður af Þeistareykjum.

Hálendið

Tæplega 50 jarðskjálftar mældust undir Vatnajökli í vikunni, mun færri en í vikunni á undan þegar þeir voru um 120. Átta skjálftar mældust í Öræfajökli, allir undir einum að stærð, mun færri en í fyrri viku. Níu skjálftar mældust í Bárðarbungu, sá stærsti 2,2 að stærð. Fimm skjálftar voru staðsettir í Grímsvötnum, sá stærsti 1,6 að stærð. Tveir skjálftar um 1,2 að stærð mældust við Skaftárkatlana. Þrettán skjálftar mældust í bergganginum undir og fyrir framan Dyngjujökul, mun færri en í síðustu viku. Tíu smáskjálftar mældust við Öskju mun færri en í síðustu viku og 25 smáskjálftar mældust við Herðubreið og Herðubreiðartögl.

Mýrdalsjökull

Fimm skjálftar mældust undir Mýrdalsjökli í vikunni, þar af þrír í Kötluöskjunni sá stærsti 1,4 að stærð. Einn smáskjálfti mældist við Kötlujökul og einn við Goðabungu. Einn skjálfti 1,0 að stærð mældist við Eyjafjallajökul og einn smáskjálfti mældist við Tindfjallajökul. Níu skjálftar mældust á Torfajökulssvæðinu, sá stærsti 1,9 að stærð.

Jarðvakt