	Veðurstofa Íslands Jarðeðlissvið

Jarðskjálftar 20190429 - 20190505, vika 18

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Rúmlega 630 jarðskjálftar voru staðsettir með SIL-mælakerfi Veðurstofu Íslands í vikunni, töluvert fleiri en í síðustu viku þegar rúmlega 330 jarðskjálftar mældust. Stærstu skjálftar vikunnar voru 2,5 að stærð 7 km suðvestan við Kópasker, þann 29. apríl, og 2,4 stærð austan við Herðubreiðartögl þann 3. maí. Mesta virknin í vikunni var austan við Herðubreiðartögl þar sem 160 skjálftar mældust dagana 2.-4. maí. Áfram var nokkur virkni á Tjörnesbrotabeltinu þar sem mældust um 140 jarðskjálftar líkt og í síðustu viku. Á öðrum stöðum var virkni með svipuðu móti og undanfarið.

Suðurland

Sextán jarðskjálftar mældust víðsvegar um Hengilssvæðið, sá stærsti 1,9 að stærð á Ölkelduhálsi og tæplega 30 skjálftar á Suðurlandsbrotabeltinu sem er svipaður fjöldi og í síðustu viku. Tveir smáskjálftar mældust 2-3 km norðvestan við topp Heklu, við Litlu-Heklu, þann 4. maí.

Reykjanesskagi

Tæplega 60 jarðskjálftar mældust á Reykjanesskaga, töluvert fleiri en í síðustu viku. Mest virkni var um 4 km norðan við Reykjanestá þar sem 36 jarðskjálftar mældust, flestir þeirra að kvöldi 2. maí. Tveir skjálftar af stærð 2,1 mældust á svæðinu sem voru stærstu skjálftar vikunnar á Reykjanesskaga. Einn skjálfti að stærð 1,7 mældist úti á Reykjaneshrygg, um 10 km vestur af Reykjanestá. Um 20 jarðskjálftar mældust víðsvegar um Reykjanesskaga í vikunni, sá stærsti af þeim 1,8 að stærð um 6 km norðvestur af Grindavík.

Norðurland

Um 140 jarðskjálftar mældust á Tjörnesbrotabeltinu í vikunni, sem er svipaður fjöldi og í síðustu viku. Af þessum skjálftum mældust rúmlega 60 í Öxarfirði, þar sem stærsti skjálftinn var 2,5 að stærð þann 29. apríl. Til viðbótar við skjálftana í Öxarfirði mældust tíu skjálftar á Grímseyjarbeltinu. Um 60 jarðskjálftar mældust á Húsavíkur-Flateyjar misgenginu í vikunni, þar af voru 40 skjálftar um 6 km norður af Gjögurtá dagana 29.-30. apríl, sá stærsti 1,4 að stærð. Um tíu smáskjálftar mældust á Kröflusvæðinu og fimm á Þeistareykjarsvæðinu í vikunni.

Hálendið

Rúmlega 80 jarðskjálftar mældust undir Vatnajökli í vikunni, nokkuð færri en í síðustu viku þegar þeir voru um 110. Sex skjálftar mældust í Bárðarbunguöskjunni, sá stærsti 1,9 að stærð. Þrír smáskjálftar mældust norðan við öskjuna í Bárðarbungu og 4 smáskjálftar austan við hana. Tólf skjálftar mældust í bergganginum undir Dyngjujökli, allir undir 1,0 að stærð. Þrír skjálftar mældust í Grímsvötnum og tveir skjálftar um 3 km sunnan við Grímsvötn. Tveir skjálftar mældust innan öskju Öræfajökuls, báðir undir 1,0 að stærð, en um 30 skjálftar mældust víðsvegar í Öræfajökli og skriðjöklum út frá honum. Átta smáskjálftar mældust 6-18 km norðvestan við Öræfajökul og þrír skjálftar í Skeiðarárjökli. Einn skjálfti af stærð 1,1 mældist í Esjufjöllum og einn smáskjálfti í Breiðamerkurjökli. Tæplega 30 jarðskjálftar mældust í Öskju, aðeins fleiri en í síðustu viku þegar þeir voru um 20, sá stærsti 1,1 að stærð. Mikil skjálftavirkni var við Herðubreið og Herðubreiðartögl í vikunni, en tæplega 200 skjálftar mældust þar. Flestir skjálftanna urðu austan við Herðubreiðartögl eða um 160 og var mesta virknin 2.-4. maí. Stærsti skjálftinn þar mældist 2,4 að stærð sem var jafnframt næst stærsti skjálfti vikunnar. Tveir smáskjálftar urðu við Herðubreiðarfjöll, norðan við Herðubreið. Einn skjálfti af stærð 1,1 mældist í Geitlandsjökli.

Mýrdalsjökull

Fjórtán jarðskjálftar mældust í Kötluöskjunni, sem er aðeins meiri virkni en í síðustu viku, sá stærsti 2,0 að stærð þann 3. maí. 44 jarðskjálftar mældust í Torfajökulsöskjunni, töluvert fleiri en í síðustu viku þegar 20 skjálftar mældust. Stærsti skjálfti vikunnar þar var 2,1 að stærð þann 1. maí. Flestir skjálftarnir urðu í Reykjadölum, um 3-4 km vestan við Hrafntinnusker. Einn skjálfti af stærð 0,7 mældist í sunnanverðum Eyjafjallajökli.

Jarðvakt