	Veðurstofa Íslands Jarðeðlissvið

Jarðskjálftar 20190520 - 20190526, vika 21

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Rúmlega 530 jarðskjálftar mældust með SIL-mælakerfi Veðurstofunnar í vikunni, um 200 fleiri en vikuna á undan. Stærsti skjálfti vikunnar var 26. maí kl. 00:08 austsuðaustur af Grímsey, 2,9 að stærð. Svipuð virkni var við Bárðarbungu og í Öræfajökli og í liðinni viku en heldur meiri við Grímsvötn. Talsvert meiri virkni var norðan Vatnajökluls en í liðinni viku.

Suðurland

Um 40 jarðskjálftar mældust á Hengilssvæðinu, talsvert fleiri en í fyrri viku. Þar af tæplega 30 skjálftar um þrjá kílómetra norðnorðvestur af Skeggja. Um tugur skjálfta voru staðsettir á Hellisheiði og í Þrengslum. Stærstu skjálftar voru um tvö stig, aðrir mun minni. Tæplega 20 jarðskjálftar dreifðust um Suðurlandsundirlendið, enginn náði tveimur stigum að stærð. Fjórir smáskjálftar mældust við Heklu.

Reykjanesskagi

Tæplega 20 skjálftar mældust á Reykjanesskaga, flestir við Fagradalsfjall en nokkrir við Krýsuvík og Reykjanestá. Allir skjálftarnir voru um og innan við tvö stig.
Yfir 20 jarðskjálftar mældust um fimm kílómetrum suðvestur af Geirfugladrangi á Reykjaneshrygg. Stærsti var 2,7 þann 25. maí.

Norðurland

Rúmlega 70 jarðskjálftar mældust úti fyrir Norðurlandi í vikunni. Mesta virknin var í Grímseyjarbeltinu, líkt og of áður. Rúmlega 20 skjálftar voru í Öxarfirði, nokkru færri en í fyrri viku þegar 40 skjálftar mældust á því svæði. Einn skjálfti náði tveimur stigum, aðrir voru mun minni. Um 20 skjálftar voru austan og austsuðaustan Grímseyjar. Stærsti skjálftinn var 2,6 að stærð upp úr miðnætti þann 26. maí. Um tugur smáskjálfta mældist á Húsavíkur-Flateyjarmisgenginu. Nokkrir litlir skjálftar voru við Kröflu.
Nokkrir skjálftar mældust 22. maí skammt norður af Kolbeinsey og var sá stærsti 3,4 að stærð

Hálendið

Fimmtán skjálftar mældust við Bárðarbungu, litlu fleiri en í liðinni viku, allir innan við tvö stig. Álíka fjöldi var í ganginum undir Dyngjujökli, allir innan við eitt stig. Meiri virkni var við Grímsvötn í þessari viku (16) miðað við fimm í fyrri viku. Stærsti skjálftinn var 2,5 að stærð þann 22. maí kl. 19:08. Yfir 20 smáskjálftar mældust í Öræfajökli og er það svipaður fjöldi og í fyrri viku.
Á svæðinu norðan Vatnajökuls mældust um 200 jarðskjálftar og er það talsvert meiri virkni en vikuna á undan. Um helmingur voru við Herðubeið og Herðubreiðartögl. Þann 21. maí um kl. 02:28 hófst skjálftahrina skammt suðvestan við Herðubreið sem stóð fram eftir degi með rúmlega 50 mældum skjálftum. Stærsti skjálftinn varð kl. 02:48, 2,8 að stærð. Aðrir skjálftar voru flestir innan við eitt stig.
Við Öskju voru tæplega 40 skjálftar, flestir þann 25. maí í smáhrinu sem hófst laust fyrir hádegi og stóð í um tvo tíma. Stærsti skjálftinn var kl. 11:39, þann dag, 2,5 að stærð.
Í upphafi viku mældust um 50 skjálftar u.þ.b. þrjá kílómetra austsuðaustur af Lokatindi í Ódáðahrauni. Stærstu skjálftar voru um tvö stig, aðrir talsvert minni.
Fáeinir litlir skjálftar mældust við Högnhöfða, suður af Langjökli.

Mýrdalsjökull

Í Mýrdalsjökli mældust 14 smáskjálftar, um helmingi fleiri en í síðustu viku. Flestir voru innan Kötluöskjunnar. Um 20 smáskjálftar voru staðsettir á Torfajökulssvæðinu og er það um helmingi fleiri en í fyrri viku.

Jarðvakt