	Veðurstofa Íslands Jarðeðlissvið

Jarðskjálftar 20190603 - 20190609, vika 23

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Tæplega 350 jarðskjálftar voru staðsettir með SIL-mælakerfi Veðurstofu Íslands í vikunni, færri en í þeirri síðustu þegar um 440 jarðskjálftar mældust. Stærsti skjálfti vikunnar var 3,5 að stærð 9. júní um 190 km norðaustur af Kolbeinsey. Stærsti skjálfti vikunnar á landi var einnig þann 9 júní, um 12 km vestur af Kollóttadyngju, í hrauninu Útbruna norður af Öskju. Minni virkni var á flestum svæðum samanborið við fyrri viku, nema á Suðurlandi þar sem virkni var örlítið meiri. Svipuð virkni var í Öræfajökli, en aðeins meiri í Bárðarbungu og Grímsvötnum. Enginn skjálfti mældist í Heklu í vikunni.

Suðurland

Í vikunni mældust 50 skjálftar á Suðurlandi, allir undir tveimur að stærð, heldur fleiri en vikuna á undan þegar tæplega 40 skjálftar mældust. Sextán skjálftar mældust vítt og breitt á Suðurlandsundirlendinu og 34 á Hengilssvæðinu. Þar af mældust 15 á niðurdæðingasvæði við Nesjavelli 8. júní, allir undir einum að stærð. Níu skjálftar mældust inn af Reykjadal ofan Hveragerðis 6 og 7. júní. Enginn skjálfti mældist í Heklu í vikunni.

Reykjanesskagi

Fjórtán jarðskjálftar mældust á Reykjanesskaga í vikunni, heldur færri en vikuna á undan þegar þeir voru rúmlega 20. Skjálftarnir voru dreifðir um skagann og voru allir undir tveimur að stærð. Um tugur skjálfta mældist á Reykjaneshrygg í vikunni, sjö þeirra mældust þann 8. júní og var stærsti skjálftinn 2,2 að stærð.

Norðurland

Rúmlega 70 jarðskjálftar mældust á Tjörnesbrotabeltinu í vikunni, mun færri en í síðustu viku þegar tæplega 140 skjálftar mældust þar. Eins og oft áður var mesta virknin á Grímseyjarbeltinu, en þar mældust 45 skjálftar, sá stærsti 2,2 að stærð. Fimmtán skjálftar mældust í Öxarfirði og 11 norðaustur af Grímsey. Tæplega 20 skjálftar mældust auk þess á miðju beltinu. Tæplega 30 skjálftar mældust í Eyjafjarðaráli, allir innan við tveir að stærð. Að auki mældust þrír skjálftar um 190 km NNA af Kolbeinsey, sá stærsti þeirra var 3,5 að stærð 9. júní kl 09:38 og var hann jafnframt stærsti skjálfti vikunnar. Á landi mældust 16 skjálftar, þar af 11 við Þeistareyki, allir innan við einn að stærð. Fjórir smáskjálftar mældust á Kröflusvæðinu og einn við Skjálftavatn.

Hálendið

Rúmlega 130 skjálftar mældust á hálendinu í vikunni, færri en í síðustu viku þegar um 170 skjálftar mældust. Þar af mældust rúmlega 70 skjálftar undir Vatnajökli, aðeins færri en í síðustu viku. Sautján skjálftar mældust í og við Öræfajökul, svipað og í síðustu viku og voru þeir allir undir einum að stærð. Átta skjálftar mældust við Grímsvötn, fleiri en í síðustu viku, sá stærsti 1,5 að stærð. Níu skjálftar mældust í Bárðarbungu í vikunni, fleiri en í síðustu viku, sá stærsti 2,4 að stærð. Tæplega 30 skjálftar mældust í bergganginum undir Dyngjujökli, færri en í síðustu viku. Flestir eða rúmlega 20 voru á svæði suðaustur af Bárðarbungu á svæði þar sem oft verða djúpir skjálftar en 11 skjálftanna voru djúpir. Fjórir skjálftar mældust á Lokahrygg og einn norður af Tungnafellsjökli. Rúmlega 60 skjálftar mældust norður af Vatnajökli, færri en í síðustu viku. Þar af voru 23 skjálftar við Öskju og um tugur við Herðubreið og Herðubreiðartögl. Tæplega 20 skjálftar mældust norður af Kollóttadyngju. Einn skjálfti mældist um 12 km vestur af Kollóttadyngju, í hrauninu Útbruna norður af Öskju. Skjálftinn var 2,5 að stærð þann 9. júní kl 16:13 og var stærsti skjálfti vikunnar á landi. Tveir skjálftar mældust við Langjökul báðir undir tveimur að stærð.

Mýrdalsjökull

Ellefu jarðskjálftar mældust undir Mýrdalsjökli í vikunni, heldur færri en í síðustu viku. Tveir skjálftar mældust við Goðabungu, einn við Kötlujökul, sex í og við Kötluöskjuna og tveir utan jökuls. Enginn skjálfti mældist við Eyjafjallajökul. Rúmlega 30 skjálftar mældust á Torfajökulssvæðinu, heldur fleiri en í síðustu viku þegar þeir voru um 20. Flestir áttu sér stað í smá hrinu 4. júní, stærsti skjálfti hrinunnar var 1,8 að stærð.

Jarðvakt