	Veðurstofa Íslands Jarðeðlissvið

Jarðskjálftar 20190617 - 20190623, vika 25

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Rúmlega 500 jarðskjálftar voru staðsettir með SIL-mælakerfi Veðurstofu Íslands í vikunni, töluvert fleiri en í þeirri síðustu þegar 310 jarðskjálftar mældust. Stærsti skjálfti vikunnar var í Bárðarbunguöskjunni þann 18. júní kl. 22:30. Var hann 3,4 að stærð. Nokkuð meiri virkni var á öllum svæðum miðað við fyrri viku, nema í Dyngjufjöllum og við Herðubreið. Einn smáskjálfti var í Heklu í vikunni.

Suðurland

Í vikunni mældust tæplega 60 skjálftar á Suðurlandi, nokkuð fleiri en vikuna á undan þegar 40 skjálftar mældust. Rúmlega 30 skjálftar mældust vítt og breitt á Suðurlandsundirlendinu og um 20 á Hengilssvæðinu, allir undir 1,5 að stærð. Einn smáskjálfti mældist í Heklu í vikunni.

Reykjanesskagi

Tæplega 110 jarðskjálftar mældust á Reykjanesskaga í vikunni, mun fleiri en vikuna á undan þegar þeir voru tæplega 30. Skjálftarnir voru annars vegar við Fagradalsfjall norðan við Grindavík og hins vegar við sunnanvert Kleifarvatn. Nokkrir smáskjálftar voru við Reykjanestá. Stærsti skjálftinn var um M2,9 að stærð í Kleifarvatni. Nítján skjálftar mældust á Reykjaneshrygg í vikunni og var stærsti skjálftinn um M2,0 að stærð.

Norðurland

Rúmlega 100 jarðskjálftar mældust á Tjörnesbrotabeltinu í vikunni, helmingi fleiri en í síðustu viku þegar 50 skjálftar mældust þar. Á Grímseyjarbeltinu mældust tæplea 60 skjálftar, sá stærsti 2,4 að stærð þann 19. júní, rétt SA af Grímsey. Rúmlega 30 smáskjálftar mældust í Öxarfirði. Tæplega 10 skjálftar mældust í Eyjafjarðaráli og Eyjarfjarðardjúpi, allir innan við 2,0 að stærð. Tæplega 5 smáskjálftar mældust við Þeistareyki, og fimm smáskjálftar mældust á Kröflusvæðinu, allir innan við 1,5 að stærð.

Hálendið

Rúmlega 160 skjálftar mældust á hálendinu í vikunni, nokkuð fleiri en í síðustu viku. Þar af mældust rúmlega 120 skjálftar undir Vatnajökli, fleiri en í síðustu viku. Um 30 skjálftar mældust í og við Öræfajökul, svipaður fjöldi og í fyrri viku og voru þeir allir undir 1,2 að stærð. Tíu skjálftar mældust við Grímsvötn, nokkuð fleiri en í síðustu viku, sá stærsti 1,3 að stærð. Tæplega 20 skjálftar mældust í Bárðarbungu í vikunni, nokkuð fleiri en í síðustu viku, sá stærsti 3,4 að stærð kl. 22:30 þann 18. júní. Tæplega 10 smáskjálftar mældust í bergganginum undir Dyngjujökli, færri en í síðustu viku. Rúmlega 30 voru á svæði suðaustur af Bárðarbungu, þar sem oft verða djúpir skjálftar, nokkuð fleiri en verið hefur. Voru þeir allir undir 1,2 að stærð. Fjórir skjálftar mældust við Hamarinn, sá stærsti var 2,3 að stærð. Rúmlega 40 jarðskjálftar mældust norður af Vatnajökli, færri en í síðustu viku. Þar af voru um 10 skjálftar við Öskju, allir undir 1 að stærð og um 30 við Herðubreið og Herðubreiðartögl, allir undir 2,0 að stærð. Tveir skjálftar mældust við Skjaldbreið, báðir undir 1,5 að stærð.

Mýrdalsjökull

Rúmlega 30 jarðskjálftar, allir undir einnum að stærð mældust undir Mýrdalsjökli í vikunni, fleiri en í síðustu viku. Flestir skjálftar mældust í og við Kötluöskjuna og tólf við Kötlujökul. Allir undir 2,1 að stærð. Einn smáskjálfti mældist við Eyjafjallajökul. Rúmlega 10 skjálftar mældust á Torfajökulssvæðinu, nokkuð færri en í síðustu viku, stærsti skjálftinn var 1,3 að stærð, þann 20. júní.

Jarðvakt