	Veðurstofa Íslands Jarðeðlissvið

Jarðskjálftar 20190902 - 20190908, vika 36

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Rúmlega 280 jarðskjálftar voru staðsettir með SIL-mælakerfi Veðurstofu Íslands í vikunni, svipaður fjöldi og í vikunni á undan. Sjö jarðskjálftar yfir þremur stigum voru staðsettir í vikunni, flestir voru þeir langt norður af Kolbeinseyjarhrygg, um 300 km norður af landinu. Tveir jarðskjálftar yfir þremur stigum mældust í Bárðarbungu aðfaranótt 8. september, 3,2 að stærð kl 02:02 og hinn af stærð 4,2 kl 02:03. Aðeins aukin virkni var í Öskju í vikunni en annars er virkni á landinu með hefðbundum hætti.

Suðurland

Dreift um Suðurland mældust um 15 smáskjálftar, en á Hengilssvæðinu mældust um tugur skjálfta. Allir voru þeir undir tveimur stigum.

Reykjanesskagi

Tæplega 20 jarðskjálftar mældust á Reykjanesskaga í vikunni, flestir voru staðsettir við Kleifarvatn, allir undir tveimur stigum, og við Reykjanestá. Einnig voru staðsettir rúmlega 20 jarðskjálftar á Reykjaneshryggnum, flestir í þyrpingu um 30 km suðvestur af Reykjanestá. Allir þessir skjálftar voru undir þremur stigum og mældust flestir í skammvinnri hrinu 3.september. Einn skjálfti var staðsettur lengra út á Reykjaneshrygg eða um 100 km SV af Reykjanestá.

Norðurland

Á Kröflusvæðinu voru staðsettir sex smá skjálftar og aðrir tveir í nágrenni við Bæjarfjall.

Um 50 jarðskjálftar voru staðsettir norður af landinu, þar af voru um 30 skjálftar á Grímseyjarbeltinu í þremur þyrpingum. Flestir skjálftanna voru um og undir tveimur stigum, stærsti skjálftinn var af stærð 2,4 um 15 km suðaustur af Grímsey.

Hátt í annan tug jarðskjálfta mældust með mælakerfi Veðurstofunnar um 300 km norður af landinu, átta þeirra voru staðsettir, allir um og yfir þremur stigum. Hvorki staðsetning né stærð skjálftanna er vel skorðuð vegna þess hve langt er í næstu jarðskjálftamæla, og því ekki hægt að staðsetja fleiri skjálfta en gert var.

Hálendið

Rúmlega 30 jarðskjálftar voru staðsettir í Öskju, flestir í austurbrún öskjunnar, allir skjálftarnir voru undir tveimur stigum. Tíu smáskjálftar voru staðsettir í og við Herðubreið og aðrir tíu á víð og dreif á svæðinu í kringum Herðubreiðartögl og Upptyppinga. Einn skjálfti var staðsettur í Skriðutindum, rúmlega 7 km suðaustur af Skjaldbreið.

Rúmlega 80 jarðskjálftar voru staðsettir í Vatnajökli í vikunni. Í Bárðarbungu öskjunni voru staðsettir 13 jarðskjálftar og voru þar stærstu skjálftarnir 3,2 að stærð kl 02:02 aðfaranótt 8. september og annar af stærð 4,2 tíu sekúndum seinna og voru skjálftarnir á 3-5 km dýpi. Fimm djúpir smáskjálftar voru staðsettir austur af Bárðarbunguöskjunni við bergganginn undir Dyngjujökli og örfáir í ganginum sjálfum. Fjórir smáskjálftar mældust í vestanverðum Kverkfjöllum. Um tugur smáskjálfta var staðsettur í Öræfajökli og um 20 skjálftar voru staðsettir í og við skriðjökla frá sunnanverðum Vatnajökli. Þar af voru 14 smáskjálftar staðsettir í Skeiðarárjökli. Í og við Grímsvötn voru staðsettir 13 jarðskjálftar, allir um og undir tveimur stigum og voru nokkrir þeirra á 5-10 km dýpi. Flestir skjálftanna voru staðsettir í sunnanverðri öskjunni. Þrír jarðskjálftar voru staðsettir á Lokahrygg.

Mýrdalsjökull

Um tugur jarðskjálfa voru staðsettir í og við Mýrdalsjökul í vikunni, flestir á Goðabungu svæðinu. Tveir jarðskjálftar voru innan Kötluöskjunnar, báðir undir tveimur stigum. Einn jarðskjálfti af stærð 1,0 var staðsettur í Eyjafjallajökli.

Á Torfajökulssvæðinu mældust 11 jarðskjálftar á víð og dreif.

Jarðvakt