	Veðurstofa Íslands Jarðeðlissvið

Jarðskjálftar 20190916 - 20190922, vika 38

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Tæplega 400 jarðskjálftar voru staðsettir með SIL mælakerfi Veðurstofu Íslands í vikunni, u.þ.b. 100 fleiri en í vikunni á undan. Engin skjálfti var yfir þremur stigum. Smá hrinur voru útaf norðurlandi, í Öxarfirði og í Eyjafjarðaráli.

Suðurland

Tólf jarðskjálftar mældust vítt og breitt um Suðurlandsbrotabeltið, svipaður fjöldi og í vikunni á undan og voru allir undir tveimur að stærð. Ellefu skjálftar mældust á Hengilssvæðinu, mun færri en í vikunni á undan. Engin skjálfti mældist í Heklu.

Reykjanesskagi

Tæplega 20 jarðskjálftar mældust á Reykjanesskaga í vikunni, mun færri en í vikunni á undan þegar þeir voru tæplega 60.

Tveir skjálftar mældust á Reykjaneshrygg í vikunni.

Norðurland

Rúmlega 220 jarðskjálftar mældust úti fyrir Norðurlandi í vikunni, töluvert fleiri en vikuna á undan þegar þeir voru um 20. Virkni dreifðist í tveimur þyrpingum í Eyjafjarðaráli, önnur tæpa 20 km norðvestur af Gjögurtá og hin um 35 km norður af Siglufirði. Hrinan norður af Siglufirði taldi rúmlega 40 skjálfta frá 18.-19. september og voru fimm þeirra yfir 2,0 að stærð. Önnur hrina var í Öxarfirði um 15km norður af Tjörnesi og mældust tæplega 140 skjálftar í þeirri hrinu, sjö af þeim yfir 2,0 að stærð.

Sex smáskjálftar mældust við Bæjarfjall og sjö við Kröflu.

Hálendið

Tæplega 50 jarðskjálftar mældust undir Vatnajökli í vikunni, svipað og vikuna á undan. Fjórir skjálftar mældust í Bárðarbungu, allir undir 2 að stærð og tíu smáskjálftar mældust í bergganginum undir og fyrir framan Dyngjujökul. Sex smáskjálftar mældust í Öræfajökli, sjö í og við Grímsvötn, fimm í Kverkfjöllum og tveir við Hamarinn. Óróapúls mældist við Vestari-Skaftárketil fimmtudaginn 19. september kl. 19-20 sem væntanlega tengist litlu hlaupi í Skaftá.

Tæplega 30 jarðskjálftar mældust við Öskju, sem er svipaður fjöldi og í síðustu viku. Flestir skjálftarnir voru við austurbrún öskjunnar og var aðeins einn þeirra rúmlega 2 að stærð. Tæplega 20 skjálftar mældust við Herðubreið og Herðubreiðartögl í vikunni, allir undir 2 að stærð.

Einn skjálfti mældist í Langjökli, 1,0 að stærð og einn í Okinu, 2,0 að stærð.

Mýrdalsjökull

Sjö skjálftar mældust undir Mýrdalsjökli í vikunni sá stæsti 1,7 að stærð.

Einn skjálfti mældist í Eyjafjallajökli af stærð 1,1.

Fimm skjálftar mældust á Torfajökulssvæðinu, sá stærsti um 2,0 að stærð.

Jarðvakt